ಕೊಬ್ಬರಿ ಎಣ್ಣ

             'ಭಾರತೀಯ ತೆಂಗು ಪತ್ರಿಕೆ' - ಅಕ್ಟೋಬರ-ದಶಂಬರ 2014ರ ಸಂಚಿಕೆಯಲ್ಲಿ ಪ್ರಕಟಿತ ಬರೆಹದ ತುಣುಕು.

ಬೆದರು ದನಿಗೆ ಮಂಗಗಳೇ 'ಮಂಗಮಾಯ'

               ಅಡಿಕೆಗೆ ರೋಗ ಬಂದಿದೆಯೇ? ಸಿಂಗಾರ ಬಿಟ್ಟಿದೆಯೇ? ತೆಂಗನ್ನು ಕುರುವಾಯಿಯಂತಹ ಕೀಟಗಳು ಹಾಳುಮಾಡಿವೆಯೇ? ತೆಂಗು ಎಳೆಯದೇ, ಬಲಿತಿದೆಯೇ? - ತಲೆಬಿಸಿ ಮಾಡಬೇಡಿ. ನೀವಂತೂ ಮರ ಏರದಿರಿ. ಅವಸರದಲ್ಲಿ ಮರವೇರುವ ತಜ್ಞರನ್ನೂ ಆಹ್ವಾನಿಸಬೇಡಿ. ತೋಟದಲ್ಲಿ ಸುತ್ತುವ 'ಹಾರಾಡುವ ತಟ್ಟೆ' ಕಣ್ಣೆವೆ ಮುಚ್ಚುವುದರೊಳಗೆ ಈ ಪ್ರಶ್ನೆಗಳಿಗೆ ಉತ್ತರ ನೀಡುತ್ತದೆ! ಅದು ರಿಮೋಟ್ನಿಂದ ನಿಯಂತ್ರಿತ. ಕಂಪ್ಯೂನಲ್ಲಿ ಅದರ ಚಲನವಲನಗಳ ದಾಖಲಾತಿ. ಅಡಿಕೆಗೆ ರೋಗ ತಗುಲಿದೆ ಅಂತ ಗೊತ್ತಾದರೆ ಬೋರ್ಡೋ ದ್ರಾವಣ ಸಿಂಪಡಿಸುವ ವ್ಯವಸ್ಥೆಗೆ ಯಜಮಾನ ಅಣಿಯಾಗಬಹುದು. ಮನೆಯ ಜಗಲಿಯಲ್ಲಿ ಕುಳಿತು ತೋಟದ ಡಾಟಾಗಳನ್ನು ಸೇವ್ ಮಾಡಿಡುವ ವ್ಯವಸ್ಥೆ.
              ಪುತ್ತೂರಿನಲ್ಲಿ ಜರುಗಿದ ಕೃಷಿ ಯಂತ್ರಮೇಳದಲ್ಲಿ ಕುಂದಾಪುರ ಮೂಲದ ಇಂಜಿನಿಯರ್ ಭರತ್ಕುಮಾರ್ ಶೆಟ್ಟಿ ತನ್ನ ನೂತನ ಆವಿಷ್ಕಾರದ ಗುಟ್ಟನ್ನು ರಟ್ಟು ಮಾಡಿದರು. ಅವರ ಬತ್ತಳಿಕೆಯಲ್ಲಿ ಮತ್ತೊಂದು ಯೋಜನೆಯ ಕಡತದ ಮೊದಲ ಹಾಳೆಯೂ ಜತೆಯಲ್ಲಿ ತೆರೆದುಕೊಂಡಿದೆ. ಕಾಡುಪ್ರಾಣಿಗಳ ಪಲಾಯನಕ್ಕಿರುವ 'ಕೆಣಿ'ಯಿದು. ತೋಟದ ವಿವಿದೆಡೆ ಕೋವಿಗಳ ಸ್ಥಾಪನೆ. ಅವುಗಳ ನಳಿಗೆಗಳಲ್ಲಿ ಗನ್ಪೌಡರ್. ಕಾಡುಪ್ರಾಣಿಗಳು ತೋಟಕ್ಕೆ ಧಾಳಿ ಮಾಡಿವೆ ಅಂದಿಟ್ಟುಕೊಳ್ಳಿ. ಒಂದು ನಿದರ್ಿಷ್ಟ ಸಮಯದಲ್ಲಿ ಟ್ರಿಗರ್ ಚಾಲೂ ಆಗಿ ಸಿಡಿಯುವಂತೆ ಮಾಡುವ 'ಮಂಕಿ ಫಿರಂಗಿ'. 
           ಭರತ್ಕುಮಾರ್ ಶೆಟ್ಟರು ಐದು ವರುಷಗಳ ಹಿಂದೆ ಕಾಡುಪ್ರಾಣಿಗಳನ್ನು ಓಡಿಸುವ 'ಸೈರನ್' ರೂಪಿಸಿದ್ದರು. ವಿವಿಧ ದನಿಗಳನ್ನು ಉಪಕರಣದ ಮೂಲಕ ದಾಖಲಿಸಿಟ್ಟು ಅವುಗಳನ್ನು ತೋಟದಲ್ಲಿ ಧ್ವನಿವರ್ಧಕದ ಮೂಲಕ ಕೇಳಿಸುವ ವ್ಯವಸ್ಥೆ. ಇದರಿಂದಾಗಿ ಮಂಗ, ಹಂದಿ ಕಾಟದಿಂದ ಗಣನೀಯವಾಗಿ ಸುಧಾರಿಸಿಕೊಂಡ ಕೃಷಿಕರ ಯಶೋಗಾಥೆಗಳು ಅವರಲ್ಲಿವೆ. ಯಾವ ಸ್ವರಕ್ಕೆ ಮಂಗಗಳು, ಹಂದಿಗಳು ಓಡುತ್ತವೆ ಎನ್ನುವ ಅನ್ವೇಷಣೆ ಅವರವರ ತೋಟದಲ್ಲಷ್ಟೇ ಅಗಬೇಕು.
ಉ.ಕ.ಜಿಲ್ಲೆಯ ಹೊನ್ನಾವರದ ಉಪ್ಪೋಣಿಯ ಕೃಷಿಕ ಪಿ.ಎಸ್.ಭಟ್ಟರು ಮಂಗಗಳ ಬಾಧೆಯಿಂದ ಹೈರಾಣ ಆಗಿದ್ದರು. ಕೃಷಿ ಉತ್ಪನ್ನಗಳು ನಾಶವಾಗಿ ತಲೆಮೇಲೆ ಕೈಹೊತ್ತು ಕುಳಿತಾಗ ಮಾಧ್ಯಮದಲ್ಲಿ ಭರತ್ ಕುಮಾರ್ ಶೆಟ್ಟರ 'ಕಾಡು ಪ್ರಾಣಿ ಓಡಿಸುವ ಸೈರನ್' ದನಿ ಕೇಳಿಸಿತು. ಮಂಗಗಳ ಉಪದ್ರವನ್ನು ಮನದಟ್ಟು ಮಾಡಿಕೊಟ್ಟು ಸೈರನ್ ರೂಪಿಸುವಂತೆ ವಿನಂತಿಸಿದರು. ಕಾಡುಪ್ರಾಣಿಗಳು ಬೆದರುವ 'ಬೆದರು ದನಿ'ಯ ಅನ್ವೇಷಣೆಗೆ ತಾನೂ ಮುಂದಾದರು. ಪ್ರಸ್ತುತ ಬೆದರು ದನಿಯ ಕಾಟಕ್ಕೆ ವಾನರ ಸೇನೆ ಬೆದರಿದೆ. ಕಾಡು ಹಂದಿಗಳು ಭೀತವಾಗಿವೆ.
           ಪಿ.ಎಸ್.ಭಟ್ಟರ ಮುಖ್ಯ ಕೃಷಿ ಅಡಿಕೆ, ತೆಂಗು. ನಿರಂತರವಾಗಿ ಕೃಷಿ ಉತ್ಪನ್ನಗಳು ವಾನರ ಸೇನೆಗೆ ಬಲಿಯಾಗಿ ಲಕ್ಷಗಟ್ಟಲೆ ನಾಶನಷ್ಟ. ಎಳೆ ಅಡಿಕೆಯ ರಸ ಹೀರಿ ಉಗುಳುವುದು ಅವುಗಳಿಗೆ ಆಟ. ಎಳೆ ತೆಂಗಿನಕಾಯಿಗಳ ನಿರಂತರ ಆಪೋಶನ. ನಾಲ್ಕು ನೂರು ತೆಂಗಿನಮರದಿಂದ ಐದು ಸಾವಿರ ಕಾಯಿ ಸಿಕ್ಕರೆ ಪುಣ್ಯ! ಬುಡಕ್ಕೆ ಹಾಕಿದ ಗೊಬ್ಬರಕ್ಕೆ ಹೊಂಚುಹಾಕುವ ಕಾಡುಹಂದಿ. 'ಒಂದು ಹಂತದಲ್ಲಿ ಕೃಷಿಯೇ ಬೇಡ. ಮಾರಿ ಹೋಗೋಣ' ಎನ್ನುವ ನಿರ್ಧಾಾರಕ್ಕೂ ಬಂದಿದ್ದರು.
            ಕತ್ತಲ ಬದುಕಿನ ಅನುಭವ, ಹೆಜ್ಜೆಯೂರಲಾಗದ ಅಸಹಾಯಕತೆ. ಶೆಟ್ಟರ ಸೈರನ್ ದನಿ ಬದುಕಿನಲ್ಲಿ ಬೆಳಕಿನ ಎಳೆಯನ್ನು ತೋರಿಸಿತು.  'ಜೆಸಿಬಿ ಚಾಲೂ ಆದಾಗ ಶಬ್ದ ಬರುತ್ತದಲ್ಲಾ, ಆ ಸದ್ದಿಗೆ ಮಂಗಗಳು ಓಡುತ್ತವೆ,' ಆಪ್ತರೊಬ್ಬರು ಹೇಳಿದರು. 'ಕೆಂಪು ಕಲ್ಲು ಕಡಿಯುವ ಯಂತ್ರದ ಕರ್ಕಶ ಸದ್ದಿನಿಂದ ಮಂಗಗಳು ಪಲಾಯನ ಮಾಡುತ್ತವೆ', ಮತ್ತೊಂದು ಸುದ್ದಿ. ಸೋಲಿನ ನೆರೆಯಿಂದ ಕೊಚ್ಚಿಹೋಗುತ್ತಿದ್ದ ಭಟ್ಟರು ಇಂತಹ ಸುದ್ದಿಗಳಿಗೆ ಕಿವಿಯಾದರು. ಸದ್ದುಗಳನ್ನು ದಾಖಲಿಸಿಕೊಂಡು ಶೆಟ್ಟರಿಗೆ ನೀಡಿದರು. ಉಪಕರಣಕ್ಕೆ ದನಿಗಳನ್ನು ಅಳವಡಿಸಿ ತೋಟದಲ್ಲಿ ಮೊಳಗಿಸಿದರು. ಹೀಗೆ ಜಾಗಟೆ, ಜೇನು ಹುಳುಗಳ ಸದ್ದು, ಪವರ್ ಟಿಲ್ಲರ್ ಸದ್ದು, ಯಕ್ಷಗಾನದ ಚೆಂಡೆ... ಪ್ರಯೋಗಗಳು ಮಂಗಗಳಿಗೆ ದುಃಸ್ವಪ್ನವಾದುವು. ತೋಟಕ್ಕೆ ಹಾಕಿದ ಗೊಬ್ಬರ, ಎರೆಹುಳುಗಳನ್ನು ಮುಕ್ಕುವ ಕಾಡುಹಂದಿಗಳಿಗೂ ಇಂತಹುದೇ ಪ್ರಯೋಗ. ಗೂಬೆಯ ದನಿ ಇನ್ನೂ ಸಿಕ್ಕಿಲ್ಲವಂತೆ.
            ಎಲ್ಲಾ ಪ್ರಯೋಗಗಳು ಭಟ್ಟರ ನಗರಮುಖಿ ವಾಸದ ಯೋಚನೆಗೆ  ತಡೆ ಹಾಕಿವೆ. ಕೃಷಿ ಉತ್ಪನ್ನಗಳು ಅಂಗಳಕ್ಕೆ ಬಂದುವು. ತನ್ನ ಪ್ರಯತ್ನಗಳನ್ನು ಇತರ ಕೃಷಿಕರಲ್ಲೂ ಹಂಚಿಕೊಂಡರು. ತಂತಮ್ಮ ತೋಟದಲ್ಲಿ ಯಾವ್ಯಾವ ಸ್ವರ, ಉಪಾಯಗಳಿಗೆ ಮಂಗಗಳು ಓಡುತ್ತವೆ ಎನ್ನುವ ಅನ್ವೇಷಣೆಯನ್ನು ನಾವೇ ಮಾಡಬೇಕು. ಶ್ರಮ ಪಟ್ಟರೆ ಕಷ್ಟವಲ್ಲ. "ಸಬ್ಸಿಡಿಯ ಹಿಂದೆ ಓಡಲು ನಮಗೆಲ್ಲಾ ಖುಷಿ. ಪರಿಹಾರ ಸಿಗುತ್ತದೆ ಅಂದ್ರೆ ಮೈಲುಗಟ್ಟಲೆ ಕ್ಯೂ ನಿಲ್ಲಲು ಬೇಸರವಾಗುವುದಿಲ್ಲ. ಆದರೆ ನಮ್ಮ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ಪುರುಸೊತ್ತೇ ಇರುವುದಿಲ್ಲ", ಭಟ್ಟರು ಕೃಷಿಲೋಕದ ವಾಸ್ತವ ಸ್ಥಿತಿಯನ್ನು ಹೇಳುತ್ತಾರೆ.
           ಮರಗಳು ನಾಶವಾಗುತ್ತಿವೆ. ಆಹಾರಕ್ಕಾಗಿ ಹಂದಿ, ಮಂಗ, ಆನೆಗಳು ನಾಡಿಗೆ ನುಗ್ಗುತ್ತಿವೆ. ತೋಟದಲ್ಲಿ ವಸತಿ, ವಸಾಹತು ಗಟ್ಟಿಮಾಡಿಕೊಳ್ಳುತ್ತಿವೆ.. ಅತ್ತಿ, ಆಲ, ಆಶ್ವತ್ಥ, ಕಾಡು ಸಂಪಿಗೆ, ಕಾಡುಮುರುಗಲು, ಮಾವು, ಹಲಸು... ಮೊದಲಾದ ಮರಗಳು ಕೊಡಲಿಗೆ ಆಹುತಿಯಾಗಿವೆ. ಪ್ರಾಣಿ/ಪಕ್ಷಿಗಳ ಆಹಾರದ ಉದ್ದೇಶಕ್ಕಾದರೂ ನೆಟ್ಟು ಬೆಳೆಸಲು ಇಲಾಖೆಯೊಂದಿಗೆ ಕೈಜೋಡಿಸಬೇಕು. ಮೊದಲೆಲ್ಲಾ ತೆಂಗಿನಮರಗಳಲ್ಲಿ ಗುಬ್ಬಚ್ಚಿಗಳು ಗೂಡು ಕಟ್ಟುತ್ತಿದ್ದುವು. ಜೇನು ಗೂಡುಗಳು ಅಲ್ಲಿಲ್ಲಿ ಇರುತ್ತಿದ್ದುವು. ಅವೆಲ್ಲಾ ವಾನರ ಸೈನ್ಯಕ್ಕೆ ತಡೆಯಾಗಿದ್ದುವು. ಸೈರನ್ನಿಂದ ಶಾಶ್ವತ ಪರಿಹಾರ ಸಿಗದಿದ್ದರೂ ತಕ್ಷಣಕ್ಕೆ  ರಕ್ಷಣೆ ಸಿಕ್ಕಿದೆ.
           ಪಿ.ಎಸ್.ಭಟ್ಟರ ಹೊಸ ಯೋಚನೆಯೊಂದು ಚಿಂತನಗ್ರಾಹ್ಯ, ನಾಡಿಗೆ ಬಂದ ಕಾಡುಕೋಳಿಯನ್ನು ಕೊಂದರೆ ಅಪರಾಧ. ಸಾಕುಪ್ರಾಣಿಗಳಾದ ಕೋಳಿ, ಹಂದಿಯನ್ನು ಕೊಂದು ತಿನ್ನಬಹುದು. ಮಂಗನನ್ನು ಕೂಡ ಸಾಕು ಪ್ರಾಣಿ ಎಂದು ಯಾಕೆ ಪರಿಗಣಿಸಬಾರದು! ಗುಡ್ಡಗಾಡು ಪ್ರದೇಶಗಳಲ್ಲಿ ಮಂಗಗಳನ್ನು ತಿನ್ನುವ ವರ್ಗಗಳನ್ನು ಕಾಣುತ್ತೇವೆ. ಅವುಗಳ ರಕ್ತ, ಮಾಂಸಗಳಲ್ಲಿರುವ ಪೌಷ್ಟಿಕತೆಯನ್ನು ವೈಜ್ಞಾನಿಕ ಅಧ್ಯಯನ ಮಾಡಿ, ಅವುಗಳ ಔಷಧೀಯ, ಆಹಾರ ಗುಣಗಳನ್ನು ತಿಳಿಸುವ ಕೆಲಸಗಳನ್ನು ಸಂಶೋಧನಾ ಸಂಸ್ಥೆಗಳು ಮಾಡುವ  ಕಾಲ ಸನ್ನಿಹಿತವಾಗಿದೆ.
           ಬೆಂಗಳೂರಿನ 'ಗ್ರಸ್ ಇಕೋಸೈಯನ್ಸಸ್' ಸಂಸ್ಥೆಯ ಮುಖ್ಯಸ್ಥ ಮಹೇಶ್ ಅಯ್ಯರ್ ಹಕ್ಕಿ, ಪ್ರಾಣಿಗಳ ಗಡಿಪಾರಿಗೆ ಆಯಾಯ ಪ್ರಾಣಿಗಳ ಆರ್ತನಾದದ ದನಿಗಳನ್ನು ಬಳಸಿ ಯಶ ಕಂಡಿದ್ದಾರೆ. ಒಂಭತ್ತು ವಿವಿಧ ಪ್ರಾಣಿಗಳ ಕನಸನ್ನು ನುಚ್ಚುನೂರು ಮಾಡುವ ಶಬ್ದಯಂತ್ರಗಳನ್ನು ಅಭಿವೃದ್ಧಿಗೊಳಿಸಿದ್ದಾರೆ. ಆಯಾ ಪ್ರದೇಶಗಳ ವಿದ್ಯಮಾನ, ವಿಶ್ಲೇಷಣೆ ಮಾಡಿಕೊಂಡು, ಧ್ವನಿಗಳನ್ನು ಸಿದ್ಧಪಡಿಸಿ ವಾನರಬಾಧೆಯನ್ನು ತಡೆಯಬಹುದು ಎಂದು ಕಂಡುಕೊಂಡಿದ್ದಾರೆ. ಕಾಡುಪ್ರಾಣಿ ನಿಯಂತ್ರಣಕ್ಕಾಗಿ ಜೈವಶಬ್ದತರಂಗ ಯಂತ್ರ ತಯಾರಿಸುವ ಏಕೈಕ ಸಂಸ್ಥೆಯಿದು ಎಂದರೂ ತಪ್ಪಾಗಲಾರದು.
           ಬೆಂಗಳೂರು ಪೆಸ್ಟ್ ಕಂಟ್ರೋಲ್ ಸಂಸ್ಥೆಯ ಡಾ.ಪ್ರಭಾಕರರಿಂದ ಸಸ್ಯಾಧಾರಿತ 'ನೀಲ್ಬೋ' ದ್ರಾವಣದ ಕ್ಷಮತೆಯ ಪ್ರಸ್ತುತಿ. ಇದರ ಸಿಂಪಡಣೆಯಿಂದ ಉಂಟಾಗುವ ಗಾಢ ವಾಸನೆಯನ್ನು ಕಾಡುಪ್ರಾಣಿಗಳಿಗೆ ತಾಳಿಕೊಳ್ಳಲು ಕಷ್ಟ. ಮನುಷ್ಯರಿಗೆ ಅಡ್ಡಪರಿಣಾಮ ಕೊಡದ ಈ ದ್ರಾವಣವನ್ನು ಕಳೆದೆರಡು ತಿಂಗಳುಗಳಿಂದ ಪ್ರಾಯೋಗಿಕವಾಗಿ ರಾಜ್ಯದ ಕೆಲವೆಡೆ ಬಳಸುತ್ತಿದ್ದಾರೆ. ಗೋವಾದ ನೀಲೇಶ್ ಪ್ರಭು ವೆಲ್ಗಾಂವ್ಕರ್ ಕೃತಕವಾಗಿ ತಯಾರಿಸಿದ ವಿವಿಧ ತರಂಗಾಂತರಗಳ ಶಬ್ದಗಳ ಮೂಲಕ ಪ್ರಾಣಿ, ಪಕ್ಷಿಗಳ ಉಪಟಳಕ್ಕೆ ಪ್ರಾಯೋಗಿಕವಾಗಿ ಪರಿಹಾರ ಕಂಡುಕೊಂಡ ಅಡಿಕೆ ಕೃಷಿಕ.
           ಹೈದರಾಬಾದಿನ ಸಂಸ್ಥೆಯೊಂದು ಮಾರುಕಟ್ಟೆಗಿಳಿಸಿದ ಕಾಡುಹಂದಿಯನ್ನು ದೂರವಿಡುವ 'ಇಕೋಡಾನ್' ದ್ರಾವಣ ಕೇರಳದಲ್ಲಿ ಯಶಕಾಣುತ್ತಿದೆ. ಒಮ್ಮೆ ಇದನ್ನು ಬಳಸಿದರೆ ಒಂದು ತಿಂಗಳ ಕಾಲ ರಕ್ಷಣೆ ಖಚಿತ. ದ್ರಾವಣ ಅದ್ದಿದ ಸೆಣಬಿನ ಹಗ್ಗವನ್ನು ಹೊಲದ ಸುತ್ತಲೂ ಕಟ್ಟುವ ಪ್ರಯೋಗವಿದು. ಹದಿನೈದು ದಿನಕ್ಕೊಮ್ಮೆ ಹಗ್ಗಕ್ಕೆ ದ್ರಾವಣದ ಮರು ಸಿಂಪಡಣೆ. ಕಾಡು ಹಂದಿ ಮಾತ್ರವಲ್ಲ ಇಲಿ, ಹೆಗ್ಗಣಗಳೂ ವಾಸನೆಗೆ ಪರಾರಿ. ತೆಲಂಗಾಣ, ನಾಗಾಲ್ಯಾಂಡ್, ಸಿಕ್ಕಿಮ್, ಅಸ್ಸಾಂ ರಾಜ್ಯಗಳಲ್ಲಿ ಹೆಚ್ಚು ಜನಪ್ರಿಯವಾಗಿರುವ ಇಕೋಡಾನ್ ಕನ್ನಾಡಿಗೆ ಬಹುಶಃ ಈಗಷ್ಟೇ ಹೆಜ್ಜೆಯೂರಿರಬೇಕು.
          ದೇಶದಲ್ಲಿ ಕೋತಿಯಿಂದಾಗಿ ಗರಿಷ್ಠ ನಾಶ-ನಷ್ಟಗಳಾಗುವ ರಾಜ್ಯ ಹಿಮಾಚಲ ಪ್ರದೇಶ.  ಒಂದು ಅಂಕಿಅಂಶದ ಪ್ರಕಾರ ಪ್ರತಿವರುಷ ಎರಡು ಸಾವಿರ ಕೋಟಿ ರೂಪಾಯಿಗಳ ಬೆಳೆ ಅಲ್ಲಿ ನಾಶವಾಗುತ್ತಿದೆ. ಒಂದು ರಾಜ್ಯದಲ್ಲೇ ಇಷ್ಟಾಯಿತೆಂದರೆ ದೇಶಮಟ್ಟದಲ್ಲಿ ಎಷ್ಟಾಗಬಹುದು?
             ನಮ್ಮ ವಿಮಾನಯಾನ ಸಚಿವಾಲಯದ 'ರಾಷ್ಟ್ರೀಯ ಹಕ್ಕಿ ನಿಯಂತ್ರಣ ಸಮಿತಿ'ಯ ಒಂದು ಲೆಕ್ಕಾಚಾರದಂತೆ ಹಕ್ಕಿಗಳು ವಿಮಾನಕ್ಕೆ ಢಿಕ್ಕಿಯಾಗಿ ಪ್ರತಿವರುಷ ನಮ್ಮಲ್ಲಿ ಮೂರು ಸಾವಿರ ಕೋಟಿ ರೂಪಾಯಿಗೂ ಮಿಕ್ಕಿ ನಷ್ಟ ಆಗುತ್ತಿದೆಯಂತೆ! ಈ ಹಿನ್ನೆಲೆಯಲ್ಲಿ ದೇಶಕ್ಕೆ ಅನ್ನ ಕೊಡುವ ಕೃಷಿ ಕ್ಷೇತ್ರಕ್ಕೊಂದು 'ರಾಷ್ಟ್ರೀಯ ಕಾಡು ಪ್ರಾಣಿ ನಿಯಂತ್ರಣ ಸಮಿತಿ'ಯೊಂದನ್ನು ಯಾಕೆ ರೂಪಿಸಬಾರದು?
(pubished in udayavani/Nelada Nadi Coloum/14-2-2015)

ಚಳ್ಳಿಸೇವು ಮೊರಬ್ಬ

'ಚಳ್ಳಿ ಸೇವು' ತುರಿಸದ ಕೆಸುವಿನ ಪ್ರಬೇಧ. ಇದರ ದಂಡನ್ನು ಒಂದಿಂಚಿನಷ್ಟು ತುಂಡರಿಸಿ. ಮೇಲಿನ ನಾರನ್ನು ತೆಗೆಯಿರಿ. ಕುದಿಯುವ ಸಕ್ಕರೆ ಪಾಕಕ್ಕೆ ಹಾಕಿ. ರುಚಿಗೆ ನಿಂಬೆರಸ ಹಿಂಡಿ. ತಣಿದಾಗ ದಂಡು ರಸ ಹೀರಿಕೊಂಡಿರುತ್ತದೆ. ತುರಿಕೆಯ ಅಂಶವನ್ನು ನಿಂಬೆ ರಸ ಶಮನಿಸುತ್ತದೆ. ಸಿಹಿ ಮೊರಬ್ಬ ಸಿದ್ಧ. ಜನವರಿ ತಿಂಗಳಲ್ಲಿ ಜರುಗಿದ ಸೊಪ್ಪು ತರಕಾರಿ ಮೇಳದಲ್ಲಿ ಮೊರಬ್ಬವನ್ನು ಎಲ್ಲರಿಗೂ ಹಂಚಿ ಉದ್ಘಾಟನೆ ಮಾಡಲಾಗಿತ್ತು. 

ಹಸಿರ ಚಿಗುರಲ್ಲಿ ಅರಿವಿನ ಮಿಳಿತ

               ಊಟದ ಬಟ್ಟಲು ಬರಿದಾಗುತ್ತಿದೆ!
             'ರೆಡಿ ಟು ಈಟ್' ಸಂಸ್ಕೃತಿಯು ಅನುಭವಿಸಿ ತಿನ್ನುವ ಅಭ್ಯಾಸವನ್ನು ಕಸಿದುಕೊಂಡಿದೆ. ಹೊಟ್ಟೆಯು ತ್ಯಾಜ್ಯ ತುಂಬುವ ಚೀಲವಾಗಿದೆ. ಹಸಿವಾದಾಗ ಹೊಟ್ಟೆ ತುಂಬಿಸುವುದು - ಇಷ್ಟಕ್ಕೆ ಊಟ ಸೀಮಿತವಾಗಿದೆ. ಮೊಬೈಲ್ ಕಿವಿಗಂಟಿದರೆ ಮುಗಿಯಿತು. ಏನನ್ನು ಹೊಟ್ಟೆಗಿಳಿಸಿದ್ದೇವೆ, ಎಷ್ಟು ತಿಂದಿದ್ದೇವೆ, ತಿಂದ ಖಾದ್ಯದ ರುಚಿ ಹೇಗಿದೆ, ಉಪ್ಪು-ಖಾರ ಸಮಪಾಕದಲ್ಲಿದೆಯೇ? - ನಮ್ಮೊಳಗೆ ಯಾವ ಪ್ರಶ್ನೆಯನ್ನೂ ಹುಟ್ಟುಹಾಕದ ಮನಃಸ್ಥಿತಿ.
                  ಕ್ಯಾಬೇಜ್, ಹೂಕೋಸು ಪ್ರಸಿದ್ಧಿಗಿಂತ ಮೊದಲು ಹಸಿರ ಕುಡಿಗಳು ಖಾದ್ಯಗಳಾಗಿ ಬದಲಾಗುತ್ತಿದ್ದುವು. ಯಾವ್ಯಾವ ಋತುವಿನಲ್ಲಿ ಏನೇನು ತಿನ್ನಬೇಕೆಂಬ ಜ್ಞಾನ ಹಿರಿಯರ ನಾಲಗೆ ತುದಿಯಲ್ಲಿರುತ್ತಿದ್ದುವು. ದಿನಕ್ಕೊಂದು ಸೊಪ್ಪಿನ ಐಟಂ ಅನ್ನದ ಬಟ್ಟಲೇರದೆ ಭೋಜನವಾಗುತ್ತಿರಲಿಲ್ಲ. ಇವುಗಳಲ್ಲಿ ಔಷಧೀಯ ಜ್ಞಾನವೂ ಮಿಳಿತವಾಗಿರುತ್ತಿದ್ದುವು. ಯಾವಾಗ ಔಷಧಿ ಮತ್ತು ಆಹಾರಗಳು ವಿಚ್ಛೇದನ ಪಡೆದುವೋ ಅಲ್ಲಿಂದ ಸೊಪ್ಪುಗಳು, ಕುಡಿಗಳು ಮರೆಗೆ-ಮರೆವಿಗೆ ಸರಿಯಿತು.
                  ಬಸಳೆ, ಪಾಲಕ್, ಹರಿವೆ, ಮೆಂತೆ.. ಮೊದಲಾದ ಸೊಪ್ಪುಗಳನ್ನು ಹೊರತುಪಡಿಸಿದರೆ, ಮಿಕ್ಕಂತೆ ಸೊಪ್ಪು ತರಕಾರಿಗಳನ್ನು ಬೆಳೆಸುವ ಪರಿಪಾಠ ಕಡಿಮೆ. ಹಿತ್ತಿಲಲ್ಲೇ ಬೆಳೆವ ವೈವಿಧ್ಯಮಯ ಸೊಪ್ಪುಗಳನ್ನು ಪ್ರಕೃತಿ ಒದಗಿಸಿದೆ. ಅವುಗಳು ತಂಬುಳಿ, ಪಲ್ಯ, ಚಟ್ನಿ, ಸಾರಿನ ಮೂಲಕ ಹೊಟ್ಟೆಗಿಳಿದು ಉದರಾಗ್ನಿಯನ್ನು ಶಮನಿಸುತ್ತದೆ, ಆರೋಗ್ಯ ಭಾಗ್ಯವಾಗುವತ್ತಲೂ ಸಹಕರಿಸುತ್ತದೆ.
                 ಸಂತೆಯಲ್ಲಿ ಬಗೆಬಗೆಯ ತರಕಾರಿಗಳ ಮಧ್ಯೆ ಸೊಪ್ಪು ತರಕಾರಿಗಳನ್ನು ಆಯಲೆಂದೇ ಬರುವ ಸೊಪ್ಪುಪ್ರಿಯರನ್ನು ಕಾಣಬಹುದು. ನಾರಿನ ಅಂಶ, ವಿಟಮಿನ್ಗಳು, ಪೋಷಕಾಂಶಗಳಿರುವ ಸೊಪ್ಪುಗಳನ್ನು ಅನ್ನದೊಂದಿಗೆ ತಿನ್ನಬೇಕೆನ್ನುವ ಅರಿವು ಮೂಡುತ್ತಿದೆ. ವೈದ್ಯರು ಕೂಡಾ ಶಿಫಾರಸು ಮಾಡುತ್ತಿದ್ದಾರೆ. ಹಾಗಾಗಿ ಸೊಪ್ಪು ತರಕಾರಿಗಳಿಗೆ ಬೇಡಿಕೆ.
               ಬಂಟ್ವಾಳ ತಾಲೂಕಿನ (ದ.ಕ.) ಕೇಪು-ಉಬರು 'ಹಲಸು ಸ್ನೇಹಿ ಕೂಟ'ವು 'ಊಟಕ್ಕಿರಲಿ, ಸೊಪ್ಪು ತರಕಾರಿ' ಎನ್ನುವ ವಿಶಿಷ್ಟ ಕಾರ್ಯಾಾಗಾರವನ್ನು ಅನ್ಯಾನ್ಯ ಸಂಸ್ಥೆಗಳೊಂದಿಗೆ ಯೋಜಿಸಿತ್ತು. ಸೊಪ್ಪುಗಳ ಮರೆವಿನ ಕಾಲಘಟ್ಟದಲ್ಲಿ ಕಾರ್ಯಾಾಗಾರವು ಹೊಸ ದಿಕ್ಕಿನತ್ತ ಯೋಚಿಸುವಂತೆ ಮಾಡಿದೆ. ಸೊಪ್ಪುಗಳು ಊಟದ ಬಟ್ಟಲಿಗೆ ಮರಳಲು ಯೋಜನೆ ರೂಪಿಸಿದೆ. ಇಲ್ಲಿ ವಿಚಾರಗಳ ಹೆರುವಿಕೆ ಇರಲಿಲ್ಲ. ಒತ್ತಡವಿರಲಿಲ್ಲ. ಸೊಪ್ಪುಗಳಲ್ಲಿರುವ ಔಷಧೀಯ ವಿಚಾರ, ವಿವಿಧ ಖಾದ್ಯಗಳ ಸವಿರುಚಿಗಳನ್ನು ಉಣಿಸುವ ಹೂರಣ.
              ನೂರಕ್ಕೂ ಮಿಕ್ಕಿ ಸೊಪ್ಪುಗಳ ಪ್ರದರ್ಶನ. ಪರಿಚಯ ಇಲ್ಲದವುಗಳೇ ಸಿಂಹಪಾಲು. ಮಂಗಳೂರಿನ ವೈದ್ಯ ಡಾ.ಮನೋಹರ ಉಪಾಧ್ಯರ ಕನಸು. ಹಲಸು ಸ್ನೇಹಿ ಕೂಟದ ಮುಳಿಯ ವೆಂಕಟಕೃಷ್ಣ ಶರ್ಮರ ಸಾರಥ್ಯ.  ಕಾರ್ಯಾಾಗಾರದ ಪ್ರದರ್ಶನಕ್ಕಾಗಿ ಎರಡು ತಿಂಗಳ ಮೊದಲೇ  ಕಾಡು-ಹಿತ್ತಿಲುಗಳನ್ನು ಅಲೆದು, ಸಸಿಗಳನ್ನು ಗುರುತು ಹಿಡಿದು, ಆರೈಕೆ ಮಾಡಿ ಬೆಳೆಸಿದ ಇವರ ಶ್ರಮ ಅಜ್ಞಾತ. ಎಲ್ಲದರ ಬಳಕೆ ಕ್ರಮಗಳನ್ನು ಗುರುತುಹಾಕಿ, ಔಷಧೀಯ ವಿಚಾರಗಳನ್ನು ದಾಖಲಿಸಿದ್ದಾರೆ.
               ಹದಿನೈದು ವಿಧದ ಹರಿವೆ, ಏಳು ತರಹದ ಬಸಳೆ, ನಾಲ್ಕು ಜಾತಿಯ ಬ್ರಾಹ್ಮಿ, ನೆಕ್ಕರೆ ಜಾತಿಯದು ಐದು, ಪರಿಮಳದ ಸಸ್ಯಗಳು ನಾಲ್ಕು, ತಂಬುಳಿಗಾಗುವ ಸೊಪ್ಪುಗಳು ಹಲವಾರು. ಇವೆಲ್ಲಾ ಹೊಸದೇನಲ್ಲ. ನಮ್ಮ ಹಿರಿಯರು ನಿತ್ಯ ಬಳಸುತ್ತಿದ್ದಂತಹ ಸಸ್ಯಗಳು. ಪುನರ್ನವ ಮತ್ತು ಪುರುಷರತ್ನ ಎನ್ನುವ ಎರಡು ಜಾತಿಯ ಸಸ್ಯಗಳನ್ನು ಸಂಗ್ರಹಿಸಲು ತುಸು ತ್ರಾಸ ಪಡಬೇಕಾಯಿತು. ಮಿಕ್ಕಂತೆ ಹೇಳುವಂತಹ ಕಷ್ಟವಾಗಿಲ್ಲ. ಎಲ್ಲವೂ ಸುತ್ತಮುತ್ತ ಸಿಗುವಂತಹುದೇ, ಎನ್ನುತ್ತಾರೆ ಶರ್ಮ.
               ಕಾರ್ಯಾಾಗಾರದ ಅಡುಗೆಮನೆಯಲ್ಲಿ ಸೊಪ್ಪುಗಳದ್ದೇ ಕಾರುಬಾರು. ಅನ್ನ, ಮಜ್ಜಿಗೆ ಹೊರತುಪಡಿಸಿ ವಿವಿಧ ವೈವಿಧ್ಯ ಸೊಪ್ಪುಗಳ ಖಾದ್ಯಗಳು. ಬಸಳೆ, ಹರಿವೆ, ಕೆಸು, ಬ್ರಾಹ್ಮಿ.. ಮೊದಲಾದ ಕೆಲವೇ ಕೆಲವು ಹಸಿರುಗಳನ್ನು ನಿತ್ಯ ಬಳಸಿ ಗೊತ್ತಿತ್ತು. ಮಿಕ್ಕ ಹಸಿರುಗಳನ್ನು ಬಳಸಿದ, ತಯಾರಿಸಿದ ಅನುಭವ ಅಷ್ಟಕ್ಕಷ್ಟೇ. ಹಾಗಾಗಿ ಹಲಸು ಸ್ನೇಹಿ ಕೂಟದ ಸದಸ್ಯರ ಮನೆಗಳಲ್ಲಿ ಒಂದೊಂದು ಖಾದ್ಯಗಳ ಪ್ರಯೋಗ, ಪರೀಕ್ಷೆ.
               ವರ್ಮುುಡಿ ಶಿವಪ್ರಸಾದರದಲ್ಲಿ ಗೆಣಸಿನ ಸೊಪ್ಪಿನ ಪಾಯಸ ಸಿದ್ಧವಾಯಿತು.  ಕಡಂಬಿಲ  ಕೃಷ್ಣಪ್ರಸಾದರಲ್ಲಿ ದಾಲ್ತೋವೆ ರೆಡಿ. ಶರ್ಮರಲ್ಲಿ ಪಕೋಡ, ಸಾರು, ಕೇಸರಿಬಾತ್, ಸಲಾಡ್... ಹೀಗೆ ಸರದಿ ಸಾಲಿನಲ್ಲಿ ಒಂದೊಂದೇ ಖಾದ್ಯಗಳು ಪರೀಕ್ಷೆಯಲ್ಲಿ ಗೆದ್ದುವು. ಕಾರ್ಯಾಾಗಾರದ ಖಾದ್ಯಗಳ ಪಟ್ಟಿಗಳನ್ನು ನೋಡಿದರೆ ಅಬ್ಬಾ, ಸೊಪ್ಪುಗಳ ಕರಾಮತ್ತು! ಒಂದಕ್ಕೊಂದು ಸೇರಿಕೊಂಡು ದುಪ್ಪಟ್ಟು ರುಚಿ ಕೊಡುವ ಹಸಿರಿನ ತಾಕತ್ತು!.
              ವಿಟಮಿನ್ ಸೊಪ್ಪು ಮತ್ತು ಕೆಸುವಿನ ಸೊಪ್ಪುಗಳ ಪತ್ರೊಡೆ, ಕುಂಟಾಲ ಮತ್ತು ಗೇರು ಕುಡಿಗಳ 'ಗ್ರೀನ್ ಟೀ' (ಚಹ, ಕಾಫಿಯ ಬದಲಿಗೆ). ಎಳೆ ಜಾಯಿಕಾಯಿಯ ಉಪ್ಪಿನಕಾಯಿ. ಒಂದೆಲಗ ಚಟ್ನಿ. ವಿವಿಧ ಕಾಡುಕುಡಿಗಳ ತಂಬುಳಿ. ಹುರುಳಿ ಸೇರಿಸಿದ ಹರಿವೆ ಪಲ್ಯ. ನೆರುಗೆಲೆ, ಇಲಿಕಿವಿ, ನೀರ್ಪಂತಿ, ಪುಳ್ಳಂಪುರುಚಿ ಸೊಪ್ಪುಗಳ ತಿಳಿಸಾರು. ನೆಲಹರಿವೆಯ ಸಾಸಿವೆ. ನುಗ್ಗೆಸೊಪ್ಪು, ಸಿಹಿ ಕುಂಬಳ ಕುಡಿಗಳ ದಾಲ್ತೋವೆ. ಗೆಣಸಿನ ಸೊಪ್ಪಿನ ಪಾಯಸ, ಕ್ರೋಟಾನ್ ಹರಿವೆಯ ಪಕೋಡ.. ಹೀಗೆ. (ಇಲ್ಲಿ ಹೆಸರಿಸಿರುವ ಕುಡಿಗಳಿಗೆ ಪ್ರಾದೇಶಿಕವಾಗಿ ವಿವಿಧ ಹೆಸರುಗಳಿವೆ)
                  ಅನುಭವಿ ವೈದ್ಯ ಡಾ.ಶ್ರೀಕುಮಾರ್ ವೃತ್ತಿಯಲ್ಲಿ ವೈದ್ಯರು. ಸೊಪ್ಪುಗಳ ಖಾದ್ಯಗಳ ಬಳಕೆಯಿಂದ ದೇಹಕ್ಕೆ ಸಿಗುವ ಪೋಷಕಾಂಶಗಳ ಮಾಹಿತಿಯನ್ನು ನಿಖರವಾಗಿ ಹೇಳಬಲ್ಲರು. ತಮ್ಮ ಪತ್ನಿ ಆಶಾರೊಂದಿಗೆ ಕಾರ್ಯಾಾಗಾರದಲ್ಲಿ ಸೊಪ್ಪುಗಳ ಖಾದ್ಯಗಳ ಪ್ರಾತ್ಯಕ್ಷಿಕೆಯನ್ನು ಸ್ವತಃ ಮಾಡಿದರು. ಜತೆಜತೆಗೆ ಅವುಗಳ ಔಷಧೀಯ, ಸಸ್ಯಶಾಸ್ತ್ರೀಯ ಪರಿಚಯ. ಯಾವುದನ್ನು ಹೆಚ್ಚು ಸೇವಿಸಬಾರದು, ಯಾವುದನ್ನು ಸ್ವೀಕರಿಸಲೇ ಬೇಕು ಎನ್ನುವ ಮಾಹಿತಿಗಳು ಸದಾ ಅಡುಗೆ ಮನೆಯಲ್ಲಿರಬೇಕಾದವುಗಳು.
             ಹರಿವೆ, ಬಸಳೆ, ವಿಟಮಿನ್, ಪುಂಡಿ, ನೆಲಬಸಳೆ, ಗೆಣಸು ಸೊಪ್ಪುಗಳ ಸಾರು; ಬಸಳೆ ಸೊಪ್ಪಿನ ದೋಸೆ, ಗೆಣಸಿನ ಸೊಪ್ಪಿನ ವಡೆ, ತೊಂಡೆಸೊಪ್ಪಿನ ತಂಬುಳಿ; ವೀಳ್ಯದೆಲೆ, ಸಾಂಬ್ರಾಣಿ, ಬಸಳೆ ಸೊಪ್ಪುಗಳ ಪ್ರತ್ಯಪ್ರತ್ಯೇಕವಾಗಿ ತಯಾರಿಸಿದ ಪೋಡಿ(ಬಜ್ಜಿ), ಬಸಳೆ ಸೊಪ್ಪಿನ ಗೊಜ್ಜು - ಸುಮಾರು ಒಂದೂವರೆ ಗಂಟೆಯಲ್ಲಿ ಹತ್ತಾರು ಬಗೆಯ ಖಾದ್ಯಗಳನ್ನು ತಯಾರಿಸುತ್ತಿದ್ದಂತೆ ಆಸಕ್ತ ಅಮ್ಮಂದಿರ ನೋಟ್ ಬುಕ್ಕಿನಲ್ಲಿ ದಾಖಲಾದುವು.
              ಖಾದ್ಯಗಳನ್ನು ಕಣ್ಣೆದುರೇ ಮಾಡಿ ತೋರಿಸಿದಾಗ ಒಲವು, ವಿಶ್ವಾಸ ಹೆಚ್ಚು. ವಾಹಿನಿಗಳಲ್ಲಿ ಬಿತ್ತರವಾಗುವ ಅಡುಗೆ ಕಾರ್ಯಕ್ರಮಗಳ ಜನಪ್ರಿಯತೆಯ ಗುಟ್ಟು ಇದೇ ಇರಬಹುದೇನೋ? ಹೊಸ ಹೊಸ ರುಚಿಗಳನ್ನು ಸವಿಯಲು ಹವಣಿಸುವ ನಾಲಗೆಗಳಿಗೆ ಪ್ರಾತ್ಯಕ್ಷಿಕೆ, ಕಾರ್ಯಾಾಗಾರಗಳು ಉತ್ತಮ ವೇದಿಕೆ. ಹಲಸು ಸ್ನೇಹಿ ಕೂಟವು ಹಿಂದೆ ಏರ್ಪಡಿಸಿದ್ದ ಹಲಸು, ಮಾವು ಮೇಳಗಳ ಅಡುಗೆ ಪ್ರಾತ್ಯಕ್ಷಿಕೆ;. ಖಾದ್ಯಗಳ ಸ್ಪರ್ಧೆಗಳಲ್ಲಿ ನೂರಾರು ಖಾದ್ಯಗಳ ಪ್ರದರ್ಶನಗಳ ಸೊಬಗು ನೆನಪಾಗುತ್ತದೆ. ಇವೆಲ್ಲಾ ಸೀಮಿತ ಸಂಪನ್ಮೂಲ ಮತ್ತು ಹೆಗಲುಗಳಿಂದಾಗಿ ಸಂಪನ್ನವಾಗಿತ್ತು.
              ಸೊಪ್ಪು ತರಕಾರಿ ಕಾರ್ಯಾಾಗಾರದಲ್ಲಿ ಖಾದ್ಯಗಳನ್ನು ಸಿದ್ಧಪಡಿಸಿದ ಸೂಪಜ್ಞರಿಗೆ ಇವೆಲ್ಲಾ ಹೊಸತು. ಸಮಾರಂಭಗಳಲ್ಲಿ ಸಿದ್ಧ ಮೆನುಗಳನ್ನು ಸಿದ್ಧಪಡಿಸಿ ಅನುಭವವಿತ್ತಷ್ಟೇ. ಶರ್ಮ ಬಳಗ ಸೂಪಜ್ಞರ ಹಿಂದೆ ನಿಂತು ಸವಿಸವಿಯಾದ ಖಾದ್ಯಗಳನ್ನು ಉಣಬಡಿಸಿದ್ದು ನಿಜಕ್ಕೂ ಹೆಚ್ಚುಗಾರಿಕೆ. ಮಾದರಿಗಳು ಮುಂದಿದ್ದಾಗ ಅನುಸರಣೆ ಸುಲಭ. ಕಾರ್ಯಗಾರದಲ್ಲಿ ಖಾದ್ಯಗಳ ಮಾದರಿಗಳು ರೂಪುಗೊಂಡಿವೆ. ಏನಿಲ್ಲವೆಂದರೂ ಹತ್ತಾರು ಮನೆಗಳಲ್ಲಿ ಈ ಖಾದ್ಯಗಳ ಪ್ರಯೋಗವಂತೂ ನಡೆದಿದೆ.
              ನಿರ್ವಿಷವಾಗಿ ಸಿಗಬಲ್ಲ ಸೊಪ್ಪು ತರಕಾರಿಗಳ ಸೇವನೆ ನಿತ್ಯ ಆಹಾರದಲ್ಲಿ ಸೇರಿಕೊಳ್ಳಬೇಕು ಎನ್ನುವುದು ಕಾರ್ಯಾಗಾರದ ಉದ್ದೇಶ. ಹೆಸರಿನ ಗೀಳಿಗಾಗಿ ಫೋಸ್ ನೀಡುವವರು ಹಲಸು ಸ್ನೇಹಿ ಕೂಟದಲ್ಲಿಲ್ಲ. ಫಂಡ್ಗಳ ಹಿಂದೆ ಓಡುವ ಮಾತಂತೂ ದೂರ. ನಮ್ಮ ಮನೆಯಿಂದಲೇ ಬದಲಾವಣೆ ಶುರುವಾಗಬೇಕೆನ್ನುವುದು ದೂರದೃಷ್ಟಿ. ಕೂಟದ ಬಹುತೇಕ ಎಲ್ಲಾ ಸಮಾರಂಭಗಳ ಮೆನುಗಳು ಸದಸ್ಯರ ಮನೆಗಳಲ್ಲಿ ಪ್ರಯೋಗ-ಪರೀಕ್ಷೆಗೆ ಒಳಪಟ್ಟು ನಿರ್ಧಾಾರವಾಗುತ್ತದೆ.
                ಹಲಸು, ತರಕಾರಿ, ಮಾವು, ಸಿರಿಧಾನ್ಯ, ಗೆಡ್ಡೆತರಕಾರಿ.. ಗಳ ಕಾರ್ಯಗಾರಗಳನ್ನು ಸ್ನೇಹಿ ಕೂಟವು ಕಳೆದ ನಾಲ್ಕೈದು ವರುಷಗಳಲ್ಲಿ ಏರ್ಪಡಿಸಿತ್ತು. ಆರೋಗ್ಯವು ಭಾಗ್ಯವಾಗಬೇಕೆನ್ನುವ ಸಮಾನ ಮನಸ್ಸುಗಳ ಜಾಲ ರೂಪುಗೊಂಡಿದೆ. ಮೆದುಳಿಗೆ ಮೇವನ್ನು ಒದಗಿಸುವ ಜತೆಗೆ ಹೊಸ ಹೊಸ ಖಾದ್ಯಗಳನ್ನು ಸ್ನೇಹಿ ಕೂಟವು ಪರಿಚಯಿಸುತ್ತಿರುವುದರಿಂದ ಅಮ್ಮಂದಿರ ಒಲವು ಹೆಚ್ಚಾಗಿದೆ. ಸುಮಾರು ಇಪ್ಪತ್ತು ಕಿಲೋಮೀಟರ್ ವ್ಯಾಪ್ತಿಯ ಈ ಸದ್ದಿಲ್ಲದ ಕಾಯಕ ಇತರೆಡೆಯೂ ಹಬ್ಬಬೇಕು. ಅದು ಕೇಪು-ಉಬರಿಗೆ ಸೀಮಿತವಾಗಬಾರದು. ಅಂತಹ ಮನಸ್ಸುಗಳು ರೂಪುಗೊಳ್ಳಬೇಕಾದುದು ಕಾಲದ ಅನಿವಾರ್ಯತೆ.
(ಉದಯವಾಣಿ-ನೆಲದನಾಡಿ ಅಂಕಣ-29-1-2015)

ಆಲೂಗೆಡ್ಡೆ ಸಿಪ್ಪೆ ತೆಗೆಯುವ ಯಂತ್ರ

ಪುತ್ತೂರಿನಲ್ಲಿ ಜರುಗಿದ ಕೃಷಿ ಯಂತ್ರ ಮೇಳದಲ್ಲಿ 'ಆಲೂಗೆಡ್ಡೆ (ಬಟಾಟೆ) ಸಿಪ್ಪೆ ತೆಗೆಯುವ ಯಂತ್ರ ಕುತೂಹಲಕರ.

ಕೃಷಿ ಯಂತ್ರ ಮೇಳ (Agri machinery fair 2015) - ಕೆಲವು ಕ್ಷಣಗಳು

    ಯಂತ್ರ ಮೇಳದ ಆವರಣದಲ್ಲಿ ಪುತ್ತೂರು ಪುರಸಭಾಧ್ಯಕ್ಷರಿಂದ ಗಣರಾಜ್ಯೋತ್ಸವ ಧ್ವಜಾರೋಹಣ

             ಮಧ್ಯಮ ಕೇಂದ್ರದಲ್ಲಿ ರಾಮಚಂದ್ರ  ಕಾಮತ್, ಮಂಚಿ ಶ್ರೀನಿವಾಸ ಆಚಾರ್ ಮತ್ತು ಪತ್ರಕರ್ತ ರಮೇಶ್ ಕೈಂತಜೆ

 ಯಂತ್ರಮೇಳದ ಮಾಹಿತಿ ಕೈಪಿಡಿ ಬಿಡುಗಡೆಗೊಂಡಾಗ....

ಪುತ್ತೂರು ವಿವೇಕಾನಂದ ಕಾಲೇಜಿನ ಪತ್ರಿಕೋದ್ಯಮ ವಿಭಾಗದ ಮುಖವಾಣಿ 'ವಿಕಸನ' ಪತ್ರಿಕೆಯು ಯಂತ್ರಮೇಳದಲ್ಲಿ ಎರಡು ವಿಶೇಷ ಪುರವಣಿಯನ್ನು ಮುದ್ರಿಸಿತ್ತು. ಅದು ಬಿಡುಗಡೆಗೊಂಡಾಗ ವಿದ್ಯಾರ್ಥಿಗಳಿಗೆ ಸಾರ್ಥಕ ಭಾವ. ಈ ಪುರವಣಿಯ ಎಲ್ಲಾ ವೆಚ್ಚವನ್ನು ಯಂತ್ರ ಮೇಳ ಭರಿಸಿತ್ತು.

ವಿದ್ಯಾರ್ಥಿಗಳ ಧೈರ್ಯ, ಆತ್ಮವಿಶ್ವಾಸ

ಪುತ್ತೂರಿನ ವಿವೇಕಾನಂದ ವಿದ್ಯಾಲಯದ ವಿದ್ಯಾರ್ಥಿಗಳಿಗೆ ತಮ್ಮ ಆವಿಷ್ಕಾರಗಳನ್ನು ಕೃಷಿಕರಿಗೆ ವಿವರಿಸಲು ಖುಷಿ. ಸ್ಪಷ್ಟವಾಗಿ, ಅರ್ಥವತ್ತಾಗಿ ಪಟಪಟನೆ ವಿವರಗಳನ್ನು ಹೇಳುವ ವಿದ್ಯಾರ್ಥಿಗಳ ಧೈರ್ಯ, ಆತ್ಮವಿಶ್ವಾಸ ಕೃಷಿಕರ ಮನಸೆಳೆಯಿತು. ಸಮವಸ್ತ್ರ ಮತ್ತು ತಲೆಗೆ ಅಡಿಕೆ ಹಾಳೆಯ ಟೊಪ್ಪಿ, ಅದರ ಮೇಲೊಂದು ಕೀರೀಟವನ್ನು ಹೋಲುವ ರಚನೆ. ತುಂಬಾ ಖುಷಿ ಕೊಟ್ಟ ಮಳಿಗೆಯಿದೆ. ಎಲ್ಲಾ ವಿದ್ಯಾರ್ಥಿಗಳಿಗೆ ಅಭಿನಂದನೆಗಳು.