Monday, April 27, 2015
ಬಂಟ್ವಾಳ (ದ.ಕ.)ದಲ್ಲಿ ಹಲಸು ಸಂತೆ
Friday, April 24, 2015
ಬೆಟ್ಟು ಆಡಿಸಿದರೆ ಬೆಟ್ಟವೂ ಕರಗುತ್ತೆ..!
ಬೆಟ್ಟು ಆಡಿಸಿದರೆ ಬೆಟ್ಟವೂ ಕರಗುತ್ತೆ..!
"ಸಾವಯವ ಎನ್ನುವುದು ಕೃಷಿ ಪದ್ಧತಿಯಲ್ಲ, ಅದೊಂದು ಶುದ್ಧ ಬದುಕು."
ತೀರ್ಥಹಳ್ಳಿಯ ಕೀರ್ತಿಶೇಷ ಕುರುವಳ್ಳಿ ಪುರುಷೋತ್ತಮ ರಾಯರ ಪ್ರತಿಪಾದನೆಯಿದು. ಅದು ಭಾಷಣವಲ್ಲ, ಅನುಷ್ಠಾನ. ಕೃಷಿಯಲ್ಲಿ ಹೊಸ ಹಾದಿಯ ರೂಪೀಕರಣ. ಮೊದಲಿಗೆ ತನ್ನ ತೋಟದಲ್ಲಿ ಸಾವಯವ ಮನಸ್ಸನ್ನು ಬಿತ್ತಿದರು. ಆ ಹಾದಿಯಲ್ಲಿ ಕ್ರಮಿಸಿ ಸಾವಯವ ಬದುಕನ್ನು ಅಪ್ಪಿಕೊಂಡ ಸಾವಿರಾರು ಹೊಲಗಳಿಂದು ಶುದ್ಧ ಮನಸ್ಸನ್ನು ಕಟ್ಟಿಕೊಡುವ ತಾಣಗಳಾಗಿವೆ.
ರಾಯರ 'ಕೃಷಿ ನಿವಾಸ'ಕ್ಕೆ ಕೃಷಿಕರ ತಂಡವೊಂದು ಆಗಮಿಸಿತ್ತು. ತೋಟ ಸುತ್ತುತ್ತಾ ಇದ್ದಂತೆ ಒಬ್ಬರು ಗಿಡದ ಕೊಂಬೆಯೊಂದನ್ನು ಮುರಿದರಂತೆ. ಗಿಡ ಚಿವುಟುವ ಬದಲು ನನ್ನನ್ನೇ ಚಿವುಟಿ. ನನ್ನನ್ನು ಚಿವುಟುವಾಗ ನೀವು ಯೋಚನೆ ಮಾಡ್ತೀರಿ ಅಲ್ವಾ. ಆದರೆ ಗಿಡವನ್ನು ಚಿವುಟುವಾಗ ಆ ವಿವೇಕ ನಿಮ್ಮಲ್ಲಿ ಯಾಕೆ ಉದಯಿಸುವುದಿಲ್ಲ? ಎಂದರು. ಕೃಷಿ ಕ್ಷೇತ್ರವನ್ನು ರಾಯರು ಕಾಣುವ ದೃಷ್ಟಿಯಿದು.
ನಿಮ್ಮ ಜಮೀನಿನಲ್ಲಿರುವ ಎಲ್ಲಾ ಗಿಡಗಳನ್ನು ಮುಟ್ಟಿದ್ದೀರಾ? ಜಮೀನಿನ ಎಲ್ಲಾ ಭಾಗವನ್ನು ಬರಿಗಾಲಿನಿಂದ ಮೆಟ್ಟಿದ್ದೀರಾ? ಎಂದಾದರೂ ಬಿಳಿ ಕಾಗದದ ಮೇಲೆ ಗಿಡಕ್ಕೆ ಏನೂ ಮಾಡಿಲ್ಲ ಎನ್ನುವುದನ್ನು ಬರೆದಿದ್ದೀರಾ? ಈ ಮೂರು ಪ್ರಶ್ನೆಗಳನ್ನು ಕೇಳದೆ ರಾಯರ ಭಾಷಣ ಮುಂದೆ ಹೋಗದು. ತಾನು ಅನುಷ್ಠಾನಿಸಿದ್ದರಿಂದ ಇಂತಹ ಖಡಕ್ ಪ್ರಶ್ನೆಗಳನ್ನು ಸಾರ್ವಜನಿಕವಾಗಿ ಕೇಳುವ ಧೈರ್ಯ ಅವರಲ್ಲಿತ್ತು. ಕೃಷಿಯಲ್ಲಿ ಆಗಬೇಕಾದ್ದು 'ಕ್ರಾಂತಿ' ಅಲ್ಲ, 'ವಿಕಾಸ' ಎಂಬುದನ್ನು ಅನುಭವದಿಂದ ಅರಿತುಕೊಂಡಿದ್ದರು.
ರಾಯರು ದೂರವಾಗಿ ಹದಿನೇಳು ಸಂವತ್ಸರಗಳು ಸಂದುವು. ಅವರ ಯೋಚನೆಗಳನ್ನು 'ಪುರುಷೋತ್ತಮ ರಾವ್ ಕೃಷಿ ಸಂಶೋಧನಾ ಪ್ರತಿಷ್ಠಾನ'ವು ಅಕ್ಷರಶಃ ಮುನ್ನಡೆಸುತ್ತಿದೆ. ಶುದ್ಧ ಬದುಕಿನ ಚಿಂತನೆಯ ಯುವ ಮನಸ್ಸುಗಳು ಪ್ರತಿಷ್ಠಾನದ ಆಶಯವನ್ನು ಕನ್ನಾಡಿನಾದ್ಯಂತ ಪಸರಿಸುತ್ತಿದೆ. ಇದರ ಚಟುವಟಿಕೆಯ ಒಂದು ಭಾಗವಾಗಿ ಸಾವಯವ ರೈತ ದಂಪತಿಗಳನ್ನು ಆಯ್ಕೆಮಾಡಿ ಅವರಿಗೆ 'ಪುರುಷೋತ್ತಮ ಸಂಮಾನ' ನೀಡಿ ಗೌರವಿಸುತ್ತಿದೆ. ಸಂಮಾನಿತರ ಕುರಿತು 'ಸಾಧಕ ಸಾಧನೆ' ಎನ್ನುವ ಚಿಕ್ಕ ಪುಸ್ತಿಕೆಯನ್ನು ಪ್ರಕಟಿಸುತ್ತಿದೆ.
ಈ ಬಾರಿಯ ಸಂಮಾನವು ಮಂಗಳೂರಿನಲ್ಲಿ ಜರುಗಿತು. ಚಿಕ್ಕಮಗಳೂರು ಜಿಲ್ಲೆಯ ತರೀಕೆರೆ ತಾಲೂಕಿನ ಅಮೃತಾಪುರ ಹೋಬಳಿಯ ವಿಠಲಾಪುರ ರುದ್ರಮ್ಮ-ರುದ್ರಪ್ಪ ಮತ್ತು ಚಂದ್ರಮ್ಮ-ವೀರಪ್ಪ ದಂಪತಿ ಕುಟುಂಬಕ್ಕೆ ಪ್ರಶಸ್ತಿ ನೀಡಲಾಗಿತ್ತು. ಕುಟುಂಬವೊಂದಕ್ಕೆ ಪ್ರಶಸ್ತಿಯನ್ನು ನೀಡುವ ಪ್ರತಿಷ್ಠಾನದ ಉಪಕ್ರಮ ಶ್ಲಾಘ್ಯ ಮತ್ತು ಮಾದರಿ. ಇಡೀ ಕುಟುಂಬವನ್ನು ವೇದಿಕೆಯಲ್ಲಿ ಕುಳ್ಳಿರಿಸಿ, ಅವರ ಸಾಧನೆಯ ಸಾಕ್ಷ್ಯಚಿತ್ರವನ್ನು ಪ್ರಸಾರಿಸಿ, ಸಂಮಾನಿಸಿದ ಕ್ಷಣ ಪುಳಕ ತರುವಂತಾದ್ದು.
ಕುಟುಂಬದ ಯಜಮಾನನ ಹಿಂದೆ ಇತರ ಸದಸ್ಯರ ತನುಶ್ರಮವೂ ಗರಿಷ್ಠ ಪ್ರಮಾಣದಲ್ಲಿ ಮಿಳಿತವಾಗಿರುತ್ತವೆ. ಅವೆಂದೂ ದಾಖಲಾಗುವುದಿಲ್ಲ. ಮನೆಯೆಂಬ ಸೂರಿನಡಿಯಲ್ಲಿ ಹಲವು ಮನಸ್ಸುಗಳು ಕನಸುಗಳನ್ನು ಅರಳಿಸುತ್ತವೆ. ಕನಸುಗಳು ಹಸಿರಿನ ಸುತ್ತ ಸುತ್ತಲು ಗೌರವದ ಶ್ರೀರಕ್ಷೆ ಬೇಕು. ಕೃಷಿಯಲ್ಲೂ ಗೌರವವಿದೆ ಎನ್ನುವ ಭಾವವನ್ನು ಇಂತಹ ಪ್ರಶಸ್ತಿಗಳು ಸಿಂಚನ ಮಾಡುವುದರಿಂದ ಕುಟುಂಬದ ಸದಸ್ಯರಿಗೂ ಮಾನ ಸಿಕ್ಕಿದಂತಾಗುತ್ತದೆ.
ಪ್ರಶಸ್ತಿ ಪುರಸ್ಕೃತ ರುದ್ರಪ್ಪ-ವೀರಣ್ಣ ಕುಟುಂಬ ಸಾವಯವ ಕೃಷಿಕರೆನ್ನುವುದಕ್ಕಿಂತ ಸಾವಯವ ಮನಸ್ಸುಗಳನ್ನು ಕಟ್ಟಿಕೊಳ್ಳಲು ಬೇಕಾದ ಒಳಸುರಿಗಳನ್ನು ತನ್ನ ಭೂಮಿಯಲ್ಲಿ ಬೆಳೆದವರು ಎನ್ನಬಹುದೇನೋ. ಬರದ ಭೂಮಿಯ ಬಡತನದಲ್ಲಿ ಹುಟ್ಟಿದ ಈ ಸಹೋದರರಿಗೆ ದುಡಿಮೆ ಅನಿವಾರ್ಯವಾಗಿತ್ತು. 'ದುಡಿಯಬೇಕು, ದುಡಿದು ಬದುಕಬೇಕು. ದುಡಿಮೆಯೊಂದೇ ಬಡತನಕ್ಕೆ ಮದ್ದು. ಬೆಟ್ಟು ಆಡಿಸಿದ್ರೆ ಬೆಟ್ಟ ಸವೆಯುತ್ತೆ' ಎಂಬ ನಿರ್ಧಾರ. ಅದುವೇ ಬದುಕಿನ ಯಶದ ಮಂತ್ರವಾಯಿತು.
ಪಾಲಿಗೆ ಬಂದಿತ್ತು, ಉಬ್ಬುತಗ್ಗು ಭೂಮಿ. ಕೂಲಿ ಕೊಟ್ಟು ಸಮತಟ್ಟು ಮಾಡುವಷ್ಟು ಸದೃಢರಲ್ಲ. ಸಮತಟ್ಟು ಮಾಡದೆ ಕೃಷಿ ಮಾಡುವಂತಿಲ್ಲ. ಇಬ್ಬರೂ ಈ ಕೆಲಸ ಮಾಡಿದರೆ ಹೊಟ್ಟೆಯ ಮೇಲೆ ತಣ್ಣೀರ ಬಟ್ಟೆಯೇ ಗತಿ! ರುದ್ರಪ್ಪರಿಗೆ ಭೂಮಿಯ ಏರುತಗ್ಗನ್ನು ಸಮತಟ್ಟು ಮಾಡುವ ಕಾಯಕ. ವೀರಣ್ಣರಿಗೆ ಹೊರಗಡೆ ವಿವಿಧ ಕಸುಬು ಮಾಡಿ ಹಣ ಹೊಂದಿಸುವ ಕೆಲಸ. ಸಹೋದರರ ಛಲಕ್ಕೆ ಭೂಮಿಯು ಹತ್ತಿಯಂತೆ ಹಗುರವಾಯಿತು! ಮೂರು ದಶಕದ ಹಿಂದಿನ ಕತೆಯಿದು. ಬಾಳೆ ಕೃಷಿಯಿಂದ ಕೃಷಿಗೆ ಶ್ರೀಕಾರ. ಬಾಳೆ ಬೆಳೆದೋನು ಬದುಕಿದ' ಎಂಬ ಗಾದೆಯನ್ನು ಸತ್ಯ ಮಾಡಿದ ಶ್ರಮಿಕರಿವರು.
ಕೃಷಿ ಅಂದರೆ ರಾಸಾಯನಿಕ ಗೊಬ್ಬರ ಹಾಕಲೇಬೇಕು - ಎಂಬ ಮಾಹಿತಿಯು ಅರಿವಿನ ರೂಪದಲ್ಲಿ ರುದ್ರಪ್ಪ-ವೀರಣ್ಣರ ತಲೆ ಹೊಕ್ಕರೂ ರಾಸಾಯನಿಕದ ಸಹವಾಸ ದುಬಾರಿ ಎನ್ನುವ ಕಲ್ಪನೆಯಿತ್ತು. ಹಾಗಾಗಿ ಆರಂಭದಿಂದಲೂ ರಾಸಾಯನಿಕ ರಹಿತವಾದ ಕೃಷಿಯತ್ತ ಒಲವು. ನಾಡಿನ ವಿವಿಧ ಕೃಷಿಕರಲ್ಲಿಗೆ ಭೇಟಿ. ಅಲ್ಲಿನ ಕೃಷಿ ಪದ್ಧತಿಗಳ ಪ್ರತ್ಯಕ್ಷ ವೀಕ್ಷಣೆ. ತಮ್ಮ ಹೊಲಕ್ಕೆ ಸೂಕ್ತವಾಗಬಹುದಾದ ವಿಚಾರಗಳ ಅಧ್ಯಯನ.
ಮಣ್ಣಿನ ಫಲವತ್ತತೆಯನ್ನು ಹೆಚ್ಚಿಸುವ ವಿವಿಧ ಮಾದರಿಗಳನ್ನು ಅಭ್ಯಸಿಸಿ ಮೊದಲಿಗೆ ಎರೆಗೊಬ್ಬರ ಘಟಕ ತೆರೆದರು. ಪಶು ಆಹಾರವನ್ನು ಬೆಳೆದರು. ಪ್ರಸ್ತುತ ದೇಸಿ ಗೋ ತಳಿಗಳ ಸಂಸಾರ ವೃದ್ಧಿಸಿದರು. ಗೀರ್, ಹಳ್ಳಿಕಾರ್, ಅಮೃತ್ಮಹಲ್, ಮಲೆನಾಡು ಗಿಡ್ಡ, ಕಾಂಕ್ರೆಜ್.. ಮೊದಲಾದ ಹನ್ನೆರಡು ದೇಸಿ ತಳಿಯ ಜಾನುವಾರು ಸಂಸಾರಗಳಿವೆ. ಅವರ ಹೈನುಗಾರಿಕೆಯ ಒಂದು ಲೆಕ್ಕಾಚಾರ ನೋಡಿ, ಒಂದು ಕಿಲೋ ಹಸುವಿನ ತುಪ್ಪಕ್ಕೆ ನಮ್ಮಲ್ಲಿ ಒಂದೂವರೆ ಸಾವಿರ ರೂಪಾಯಿ ದರ. ಒಂದು ಕಿಲೋ ತುಪ್ಪ ತಯಾರಾಗಲು ಇಪ್ಪತ್ತೈದು ಲೀಟರ್ ಹಾಲು ಬೇಕು. ಅಂದರೆ ಒಂದು ಲೀಟರ್ ಹಾಲಿಗೆ ಅರುವತ್ತು ರೂಪಾಯಿ ಸಿಕ್ಕಂತಾಯಿತು! ಮೊದಲು ಡೇರಿಗೆ ಹಾಲು ಹಾಕುವಾಗ ಲೀಟರಿಗೆ ಇಪ್ಪತ್ತೈದು ರೂಪಾಯಿ ಸಿಗುತ್ತಿತ್ತು,
ವಿಠಲರಾಪುರದಲ್ಲಿ ಅಂತರ್ಜಲ ಮಟ್ಟ ಕಡಿಮೆ. ಐವತ್ತು ಕೊಳವೆ ಬಾವಿಗಳನ್ನು ಕೊರೆಸಿದರೂ ಬಾಗೀರಥಿ ನಾಪತ್ತೆ! ಒಂದೇ ಒಂದರಲ್ಲಿ ಮಾತ್ರ ನೀರಿದೆಯಷ್ಟೇ. ಮೈಕ್ರೋಸ್ಪ್ರಿಂಕ್ಲರ್ ಮೂಲಕ ನೀರುಡಿಕೆ. ಮಳೆ ನೀರನ್ನು ಹಿಡಿದು ಇಂಗಿಸುವ ವ್ಯವಸ್ಥೆ ಮಾಡಿಕೊಂಡಿದ್ದಾರೆ. ಹದಿನೈದು ಎಕ್ರೆಯಲ್ಲಿ ಅಡಿಕೆ, ತೆಂಗು, ಕೊಕ್ಕೋ, ಕಾಳುಮೆಣಸು, ಜಾಕಾಯಿ, ಬಾಳೆ, ಕಬ್ಬು, ರಾಗಿ, ಶೇಂಗಾ, ಭತ್ತ, ಹೆಸರು.... ಹಿಗೆ ಹತ್ತು ಹಲವು. ಸಮಗ್ರ ಕೃಷಿ ಪದ್ಧತಿಯ ವ್ಯವಸ್ಥಿತ ಅನುಸರಣೆ ರುದ್ರಪ್ಪ-ವೀರಣ್ಣ ಕುಟುಂಬದ ವಿಶೇಷ.
ಬೆಳೆ ಸಾವಯವ ಆದರೆ ಸಾಲದು, ಅಡುಗೆ ಮನೆಯೂ ಸಾವಯವ ಆಗಬೇಕು. ತಾನು ಬೆಳೆದ ಉತ್ಪನ್ನಗಳು ಮೊದಲಿಗೆ ತನ್ನ ಅಡುಗೆ ಮನೆ ಸೇರಬೇಕು, ಖಾದ್ಯಗಳಾಗಿ ಉದರ ಸೇರಬೇಕು ಎನ್ನುವ ಬದ್ಧತೆ. ತಮಗೆ ಬೇಕಾದ ಭತ್ತವನ್ನು ತಾವೇ ಬೆಳೆದುಕೊಳ್ಳುತ್ತಾರೆ. ಮನೆಗೆ ಬೇಕಾದಷ್ಟು ಈರುಳ್ಳಿ, ಸೊಪ್ಪು ತರಕಾರಿ, ಹಣ್ಣುಗಳನ್ನು ಬೆಳೆಯುತ್ತಾರೆ. ಕಬ್ಬು ಕೃಷಿ ಮಾಡಿ ಬೆಲ್ಲವನ್ನು ಸ್ವತಃ ತಯಾರಿಸುತ್ತಾರೆ.
ಕೃಷಿ ಪ್ರಯೋಜನವಿಲ್ಲ, ಲಾಭವಿಲ್ಲ ಎನ್ನುತ್ತಾರಲ್ಲಾ, ಪ್ರಶಸ್ತಿ ಪಡೆದ ಖುಷಿಯಲ್ಲಿದ್ದ ಸಹೋದರರನ್ನು ಮಾತಿಗೆಳೆದೆ. "ಯಾರ್ರೀ ಹೇಳಿದ್ದು? ಕೃಷಿ ಅಂದ್ರೆ ಜೀವನ. ನಾವು ಬೆವರು ಹರ್ಸಿದಷ್ಟೂ ರೊಕ್ಕ ತುಂಬಿ ಕೊಡುತ್ತೆ. ದುಡಿಯದ ಸೋಮಾರಿಗಳಿಗೆ ಕೃಷಿ ನಾಲಾಯಕ್ಕು. ಭವಿಷ್ಯದ ಜೀವನಕ್ಕೆ ಸಾವಯವ ಕೃಷಿ ಒಂದೇ ದಾರಿ. ವಿಷದಿಂದ ದೂರವಿದ್ದಷ್ಟೂ ಆರೋಗ್ಯ ಭಾಗ್ಯ. ನಾವು ಅಂಗಡಿಯಿಂದ ಸಾಮಾನು ತರೋದೇ ಇಲ್ಲ. ಎಲ್ಲಾ ಬೆಳೀತೀವಿ," ಎಂದರು. ಕೃಷಿ ಉತ್ಪನ್ನಗಳ ಮೌಲ್ಯವರ್ಧನೆ ಗಳಿಕೆಯ ಭಾಗ.
ಕುಟುಂಬದ ಶ್ರಮಕ್ಕೆ ಈಗ ಪ್ರಶಸ್ತಿಯ ಬಾಗಿನ. ಪ್ರಶಸ್ತಿ ಪ್ರದಾನ ಸಮಾರಂಭವೂ ಕೂಡಾ ಅಪ್ಪಟ ಸಾವಯವ! "ಈ ಸಮಾರಂಭದ ಉದ್ಘಾಟನೆಯಲ್ಲಿ ಬಳಸಿದ ಹತ್ತಿಯ ಬತ್ತಿ ಮತ್ತು ಅದಕ್ಕೆ ಸುರಿದ ಎಣ್ಣೆಯೂ ಸಾವಯವ ಕೃಷಿಯಿಂದ ಬೆಳೆದದ್ದು," ಎಂದು ಸಂಘಟಕರೋರ್ವರಾದ ಅರುಣ್ ಕುಮಾರ್ ಘೋಷಿಸಿದಾಗ ನಿಜಕ್ಕೂ ಆನಂದದ ಕ್ಷಣ. ಸಾವಯವ ಅನ್ನುವುದು ಕೃಷಿಯಲ್ಲ, ಅದೊಂದು ಬದುಕು ಅನ್ನುವ ಪುರುಷೋತ್ತಮ ರಾಯರ ಕನಸಿನ ಸಾಕಾರ.
ಈಚೆಗೆ ಸುಕೋ ಬ್ಯಾಂಕ್ ಪ್ರಾಯೋಜಿತ 'ಸುಕೃತ ಕೃಷಿ ಪ್ರಶಸ್ತಿ' ಪ್ರದಾನದ ಬೆನ್ನಲ್ಲೇ 'ಪುರುಷೋತ್ತಮ ಸಂಮಾನ್' ಜರುಗಿದೆ. ಎರಡೂ ಪ್ರಶಸ್ತಿಗಳ ಸಂಘಟನೆಯ ಹಿಂದೆ ಅಪ್ಪಟ ಕೃಷಿ ಮನಸ್ಸಿದೆ. ಹಾಗಾಗಿಯೇ ನೋಡಿ, ಕೃಷಿ-ಕೃಷಿಕರನ್ನು ಗೌರವದಿಂದ ಹೇಗೆ ಕಾಣಬಹುದು ಎನ್ನುವುದನ್ನು ಮಾಡಿ ತೋರಿಸಿದ್ದಾರೆ. ಇಂತಹ ಪ್ರಶಸ್ತಿಗಳು ರಾಜ್ಯ ಯಾಕೆ, ರಾಷ್ಟ್ರ ಪ್ರಶಸ್ತಿಗೆ ಸರಿ-ಸಮ.
(ಉದಯವಾಣಿ - ನೆಲದನಾಡಿ - 23-4-2015)
Tuesday, April 21, 2015
ಮಲೇಶ್ಯಾ ಮೂಲದ ಹಳದಿ ಕಲ್ಲಂಗಡಿ!
ಕಲ್ಲಂಗಡಿ ಹಣ್ಣಿನ ತಿರುಳು ಗಾಢ ಹಳದಿ!
ಕೆಂಪು ವರ್ಣದ ತಿರುಳಿನ ಕಲ್ಲಂಗಡಿ ಹಣ್ಣು ನಮಗೆಲ್ಲಾ ಗೊತ್ತು. ಇದರ ಜ್ಯೂಸ್ ಬೇಸಿಗೆಯ ನೆಂಟ. ದಾಹ ಶಮನಕ್ಕೆ ಸಹಕಾರಿ. ವಿವಿಧ ಕಂಪನಿಗಳು ಬೀಜಗಳನ್ನು ಪೂರೈಸಿ ಬೆಳೆಸಲು ಪ್ರೋತ್ಸಾಹಿಸುತ್ತಿವೆ.
ಇಲ್ಲಿ ನೋಡಿ, ಮಲೇಶ್ಯಾದಿಂದ ಹಳದಿ ತಿರುಳಿನ ಕಲ್ಲಂಗಡಿ ತಳಿಯೊಂದು ಹಾರಿ ಬಂದು ಕರಾವಳಿಯಲ್ಲಿ ಬೇರು ಬಿಟ್ಟಿದೆ. ಉಡುಪಿ ಸನಿಹದ ಅತ್ರಾಡಿಯ ಕಸಿ ತಜ್ಞ ಗುರುರಾಜ ಬಾಳ್ತಿಲ್ಲಾಯ, ಯುವ ಕೃಷಿಕ ಅನಿಲ್ ಬಳೆಂಜರಲ್ಲಿ ಬೆಳೆದಿದೆ. ಹಣ್ಣು ಬಿಟ್ಟಿದೆ.
ನಮ್ಮೂರಿನಲ್ಲಿ ಬೆಳೆವ ಕಲ್ಲಂಗಡಿಯ ಗುಣವೇ ಹಳದಿಯದ್ದಕ್ಕಿದೆ. ಗಾತ್ರ, ಎಲೆಯ ಬಣ್ಣ, ಗಿಡದ ಬೆಳವಣಿಗೆಗಳಲ್ಲಿ ವ್ಯತ್ಯಾಸವಿಲ್ಲ. ಒಳಗಿನ ಹೂರಣ ಮಾತ್ರ ಕೆಂಪಿನ ಬದಲು ಹಳದಿ. ಆಕರ್ಷಕ ನೋಟ. ಸಾಧಾರಣ ಸಿಹಿ. ಸಿಪ್ಪೆ ತೆಳು. ಕಪ್ಪು ವರ್ಣದ ಬೀಜ.
ಬಾಳ್ತಿಲ್ಲಾಯರ ಸಹೋದರ ಮಲೇಶ್ಯಾಕ್ಕೆ ಹೋಗಿದ್ದಾಗ ಹಣ್ಣು ಸೆಳೆದಿತ್ತು. ಹಣ್ಣನ್ನು ತಿಂದು ಬೀಜವನ್ನು ತಂದಿದ್ದರು. ಮಲೇಶ್ಯಾ ಮೂಲದ ರಂಬುಟಾನ್ ಇಲ್ಲಿ ಹೇರಳವಾಗಿ ಬೆಳೆಯುತ್ತದೆ ಎಂದಾದರೆ ಕಲ್ಲಂಗಡಿಯೂ ಬೆಳೆಯಬಹುದು ಎನ್ನುವ ವಿಶ್ವಾಸ.
ಅನಿಲರು ಪಡೆದ ನಾಲ್ಕು ಬೀಜಗಳಲ್ಲಿ ಮೂರು ಮೊಳಕೆ ಬಂದಿತ್ತು. ಕಳೆದ ವರುಷ ನಾಲ್ಕು ಕಾಯಿ ಕೊಟ್ಟಿತ್ತು. ಈ ವರುಷ ಹೂ ಬಿಡುತ್ತಿದೆ. ಕೆಲವು ಮಿಡಿಗಳು ಬಲಿಯಬೇಕಷ್ಟೇ. ಕಳೆದ ವರುಷ ವಿಪರೀತ ಹಣ್ಣಾದ ಬಳಿಕವೇ ಬಳಸಿದ್ದರಿಂದ ಸವಿಯ ಅನುಭವ ಆಗಿಲ್ಲ. ಅದರ ಗುಣ ಸ್ವಭಾವಗಳು ಗೊತ್ತಿಲ್ಲ. ಈ ವರುಷ ನೋಡಬೇಕು' ಎನ್ನುತ್ತಾರೆ ಅನಿಲ್. ಮೇ ಸುಮಾರಿಗೆ ಹಣ್ಣಾಗುವ ಸಾಧ್ಯತೆ ನಿಚ್ಚಳ. ಮಾಮೂಲಿ ಆರೈಕೆ. ಸೌತೆಕಾಯಿ ಸಾಲಿನ ಮಧ್ಯೆಯೂ ಬೆಳೆಸಬಹುದು.
ಹೈಬ್ರಿಡ್ ತಳಿಗಳ ಭರಾಟೆಗಳ ಮಧ್ಯೆ ಸ್ಥಳೀಯ ತಳಿಗಳು ಅಜ್ಞಾತವಾಗಿವೆ. ಹೊಸತು ಹೆಜ್ಜೆಯೂರುತ್ತಿದೆ. ಬಂಟ್ವಾಳ ತಾಲೂಕಿನ ಪೊಳಲಿ ರಾಜರಾಜೇಶ್ವರೀ ದೇವಸ್ಥಾನದ ಜಾತ್ರಾ ಸಮಯದಲ್ಲಿ ಮಾರುವುದಕ್ಕಾಗಿಯೇ ಬೆಳೆಸುವ ಸ್ಥಳೀಯ ತಳಿಗಳ ವೈಭವದ ಕಾಲಮಾನಗಳು ಈಗ ಇತಿಹಾಸ. ಬಾಳ್ತಿಲ್ಲಾಯರು, ಅನಿಲ್ ಮೊದಲಾದ ಯುವ ಉತ್ಸಾಹಿಗಳು ಕೃಷಿ ರಂಗದಲ್ಲಿಂದು ಆಸಕ್ತಿಗಳನ್ನು ಜೀವಂತವಾಗಿಟ್ಟಿರುವುದರಿಂದ ಇಂತಹ ಹೊಸ ತಳಿಗಳ ಹುಡುಕಾಟ, ಅಭಿವೃದ್ಧಿ ಆಗುತ್ತಿರುತ್ತದೆ.
ಕಳೆದ ವರುಷ ಮುಳಿಯದಲ್ಲಿ ಜರುಗಿದ ಸಿರಿಧಾನ್ಯಗಳ ಕಾಯರ್ಾಗಾರದಲ್ಲಿ ಅನಿಲರು ಹಳದಿ ಕಲ್ಲಂಗಡಿಯನ್ನು ಪ್ರದರ್ಶನಕ್ಕಿಟ್ಟಿದ್ದರು. ಈಗ ಅಭಿವೃದ್ಧಿಯ ಹಂತದಲ್ಲಿದೆಯಷ್ಟೇ. ಬೀಜ ನೀಡುವ ಹಂತಕ್ಕೆ ತಲುಪಿಲ್ಲ, ಎಂದು ವಿನೀತರಾಗಿ ಹೇಳುತ್ತಾರೆ.
ಚಿತ್ರ, ಮಾಹಿತಿ : ಅನಿಲ್ ಬಳೆಂಜ
Wednesday, April 15, 2015
ಅನ್ನದ ನೆಲದ ಹೊನ್ನಿಗೆ ಮಾನ
ಹಾವೇರಿ ಜಿಲ್ಲೆಯ ಹಾನಗಲ್ ಮಂತಗಿ ಮುತ್ತಣ ಪೂಜಾರ್ ಅವರಿಗೆ 'ಸುಕೃತ ಕೃಷಿ ಪ್ರಶಸ್ತಿ', ಸಾಗರದ ಹೆಗಡೆ ಫಾರ್ಮಿನ ಲಕ್ಷ್ಮೀನಾರಾಯಣ ಹೆಗಡೆಯವರಿಗೆ 'ಕೃಷಿ ತಂತ್ರಜ್ಞಾನ ಪ್ರಶಸ್ತಿ'ಗಳ ಪ್ರದಾನ ಸಮಾರಂಭ ಹುಬ್ಬಳ್ಳಿಯಲ್ಲಿ ಜರುಗಿತು. ಪದ್ಮವಿಭೂಷಣ ಡಾ. ವೀರೇಂದ್ರ ಹೆಗಡೆಯವರಿಂದ ಪ್ರಶಸ್ತಿ ಪ್ರದಾನ. ಎರಡೂ ಪ್ರಶಸ್ತಿಗಳೊಂದಿಗೆ ತಲಾ ಒಂದು ಲಕ್ಷ ರೂಪಾಯಿಗಳ ನಿಧಿ. ಸಮಾರಂಭದಂದು ಇಬ್ಬರು ಸಾಧಕರ ಕುರಿತು ಸಾಕ್ಷ್ಯಚಿತ್ರ ಪ್ರದರ್ಶನ. ಜತೆಗೆ ಸಾಧಕರ ಪರಿಚಯದ 'ಹೊಲದ ಹೊನ್ನು' ಪುಸ್ತಿಕೆಯ ಬಿಡುಗಡೆ. ಬಹಳ ಅರ್ಥವತ್ತಾದ, ಭಾವಪೂರ್ಣವಾದ ಕಾರ್ಯಕ್ರಮ.
ಪ್ರಶಸ್ತಿ ಪುರಸ್ಕೃತರನ್ನು ಗೌರವದಿಂದ ನಡೆಸಿಕೊಳ್ಳುವ ಅಪರೂಪದ ಖಾಸಗಿ ಕಾರ್ಯಕ್ರಮ. ಬಳ್ಳಾರಿಯಲ್ಲಿ ಕೇಂದ್ರ ಕಚೇರಿ ಹೊಂದಿದ ಸುಕೋ ಬ್ಯಾಂಕ್ ಸ್ಥಾಪಿಸಿದ ಪ್ರಶಸ್ತಿ ಸಂಚಾಲನಾ ಸಮಿತಿಗೆ ಶಿವಾನಂದ ಕಳವೆ ಸಂಚಾಲಕರು. ಗಟ್ಟಿ ಅನುಭವ ಹೊಂದಿದ ಸದಸ್ಯ ಮಂಡಳಿ. ಯಾವುದೇ ವಶೀಲಿಗಳಿಲ್ಲದೆ, ಸಾಧನೆಯೇ ಮಾನದಂಡವಾಗುಳ್ಳ ಆಯ್ಕೆ ಪ್ರಕ್ರಿಯೆ. ಇದಕ್ಕಾಗಿ 2014ರಲ್ಲಿ ಕಳವೆಯವರು ಕನ್ನಾಡಿನಾದ್ಯಂತ ಓಡಾಡಿದ್ದಾರೆ. ರೈತರನ್ನು ಮಾತನಾಡಿಸಿದ್ದಾರೆ. ಅವರ ಮನೆಯ ಸದಸ್ಯರಂತೆ ಬೆರೆದಿದ್ದಾರೆ. ಕಷ್ಟ-ಸುಖಗಳಿಗೆ ಕಿವಿಯಾಗಿದ್ದಾರೆ. ಮಣ್ಣನ್ನು ಪ್ರೀತಿಸುವ ಅಪ್ಪಟ ಕೃಷಿಕರೊಂದಿಗೆ ಸ್ನೇಹ ಸಂಪಾದಿಸಿದ್ದಾರೆ.
ಕೃಷಿ ಪ್ರಶಸ್ತಿಗಾಗಿ ರಾಜ್ಯದ ವಿವಿಧ ಭಾಗಗಳಿಂದ ನಾಲ್ಕು ನೂರ ಐವತ್ತಕ್ಕೂ ಹೆಚ್ಚು ರೈತ ಸಾಧಕರ ಮಾಹಿತಿಗಳು ಬಂದಿದ್ದುವು. ಎಲ್ಲಾ ರೈತ ಸಾಧಕರನ್ನೂ ಸ್ವತಃ ಅವರ ಹೊಲಕ್ಕೆ ಹೋಗಿ ವೀಕ್ಷಿಸಿದ ಬಳಿಕ ಕರ್ನಾಾಟಕದ ಕೃಷಿ ಸ್ಥಿತಿಗತಿಯ ಒಂದಿಷ್ಟು ಅರಿವು ದೊರಕಿದೆ. ಕೃಷಿ ನೆಮ್ಮದಿಯ ಮಾದರಿಗಳನ್ನು ಹುಡುಕುವ ಸವಾಲು ನಮ್ಮೆದುರಿಗಿತ್ತು, ಎನ್ನುತ್ತಾರೆ. ಕಾಲಿಗೆ ಚಕ್ರ ಕಟ್ಟಿಕೊಂಡು ಹಳ್ಳಿಗಳನ್ನು ಸುತ್ತಿದ ಕಳವೆಯವರ ಕಡತದೊಳಗೆ ಅರ್ಹರನ್ನೇ ಆಯ್ಕೆ ಮಾಡುವ ಬದ್ಧತೆಯ ಶಿಸ್ತು ಸುಳಿದಾಡಿತ್ತು.
ತಾನು ಓಡಾಡಿದ ಎಲ್ಲಾ ಕೃಷಿಕರ ವಿಳಾಸ ಯಾದಿ ಕಳವೆಯವರಲ್ಲಿದೆ. ಅವರನ್ನೆಲ್ಲಾ ಈ ಬಾರಿಯ ಪ್ರಶಸ್ತಿ ಪ್ರದಾನ ಸಮಾರಂಭಕ್ಕೆ ಆಹ್ವಾನಿಸಲಾಗಿತ್ತು. ಬಹುತೇಕ ಮಂದಿ ಕೃಷಿಕರು ಭಾಗವಹಿಸಿರುವುದು ಕಾರ್ಯಕ್ರಮಕ್ಕೆ ಕಳೆ ಬಂದಿತ್ತು. ಕೃಷಿ, ಕೃಷಿಕರಿಗೆ ಮಾನ ಸಂದಿರುವುದು ಎಲ್ಲರಿಗೂ ಖುಷಿ ಕೊಟ್ಟ ವಿಚಾರ. ಪ್ರಶಸ್ತಿ ಪುರಸ್ಕೃತರ ಸಾಧನೆಗೆ ಕನ್ನಡಿ ಹಿಡಿದ 'ಹೊಲದ ಹೊನ್ನು' ಪುಸ್ತಿಕೆಯು ಕೃಷಿಕರ ಕೈಯಲ್ಲಿತ್ತು. ನಮ್ಮವಲ್ಲೊಬ್ಬನಿಗೆ ರಾಜ್ಯ ಮಟ್ಟದ ಪುರಸ್ಕಾರ ಲಭ್ಯವಾದ ಖುಷಿಯೂ ಮಿಂಚಿ ಮರೆಯಾಗುತ್ತಿತ್ತು.
ಮುತ್ತಣ್ಣ ಪೂಜಾರ್ ಮಾತನಾಡುತ್ತಾ 'ಕಾಡಿಗೆ ನಮಸ್ಕಾರ, ಮರಗಳಿಗೆ ನಮಸ್ಕಾರ' ಎನ್ನುವ ತುಣುಕುಗಳನ್ನು ಮಧ್ಯೆ ಮಧ್ಯೆ ಪೋಣಿಸುತ್ತಿದ್ದುದು ಅವರು ಬೆಳೆದು ಬಂದ ದಾರಿಯ ನೆನವರಿಕೆ. ಸಾಧಕರ ಸಾಧನೆಯನ್ನು ಬಿಂಬಿಸುವ ಮಾಧ್ಯಮ ಬೆಳಕಿನಿಂದ ವ್ಯಾಪಕ ಪ್ರಚಾರ. ಕೃಷಿಕರಿಗೆ ಇಷ್ಟೊಂದು ರಾಜ ಮರ್ಯಾಾದೆಯು ಪ್ರಶಸ್ತಿ ಮೂಲಕ ಪ್ರಾಪ್ತವಾಗುತ್ತಿರುವುದು ರಾಜ್ಯಕ್ಕೆ ಮಾದರಿ. ಕೇರಳದ ಪ್ರಸಿದ್ಧ ದೈನಿಕ ಮಲೆಯಾಳ ಮನೋರಮವು ಉತ್ತಮ ಕೃಷಿಕರನ್ನೊಬ್ಬರನ್ನು ಆರಿಸಿ ಅವರಿಗೆ 'ಕರ್ಶಕಶ್ರೀ' ಪ್ರಶಸ್ತಿಯನ್ನು ಹಲವು ವರುಷಗಳಿಂದ ನೀಡುತ್ತಿದೆ. ಅಲ್ಲೂ ಕೂಡಾ ಪ್ರಶಸ್ತಿ ಪಡೆದ ರೈತರನ್ನು ಗೌರವಿಸುವ ಪರಿ ಅನನ್ಯ. ಅತ್ತ 'ಕರ್ಷಕಶ್ರೀ', ಇತ್ತ 'ಸುಕೃತ ಪ್ರಶಸ್ತಿ'.
ಸರಕಾರವು 'ಕೃಷಿ ಪಂಡಿತ' ಪ್ರಶಸ್ತಿಯನ್ನು ವರ್ಷವೂ ಘೋಷಿಸುತ್ತದೆ. ಈಚೆಗಂತೂ ಇದೊಂದು ಹರಕೆಯಾಗಿದೆ! ಆಟೋಟ ಸ್ಪಧರ್ೆಯಲ್ಲಿ ಬಹುಮಾನ ಕೊಟ್ಟಂತೆ ಕೊಡುವ ಪರಿಪಾಠ. ರಾಜ್ಯ ಮಟ್ಟದ ಪ್ರಶಸ್ತಿಯನ್ನು ತಾಲೂಕಿನ ಕಾರ್ಯಕ್ರಮವೊಂದರಲ್ಲಿ ನೀಡುವ ಪ್ರಕ್ರಿಯೆಗೂ ಚಾಲನೆ ದೊರಕಿತ್ತು. ಒಂದಿಬ್ಬರು ಪ್ರಶಸ್ತಿಯನ್ನು ನಿರಾಕರಿಸಿದ್ದರು ಕೂಡಾ. ಪ್ರಶಸ್ತಿ ಘೋಷಣೆಯಾಗಿ, ಪ್ರದಾನ ಸಮಾರಂಭ ಜರುಗುವ ಹೊತ್ತಿಗೆ ಎಂದೋ ಬರೆದಿಟ್ಟ ಚೆಕ್ ಅವಧಿ ಮುಗಿದಿರುತ್ತದೆ! ಅದನ್ನು ಸರಿಪಡಿಸಲು ನಿತ್ಯ ಅಲೆದಾಟ. 'ಯಾಕಪ್ಪಾ ಪ್ರಶಸ್ತಿ ಬಂತೋ' ಎಂದು ಗೊಣಗಾಡುವ ಮನಃಸ್ಥಿತಿಯನ್ನು ಸೃಷ್ಟಿಸುತ್ತವೆ. 'ಸುಕೃತ ಕೃಷಿ ಪ್ರಶಸ್ತಿ'ಯ ಆಯ್ಕೆ ಪ್ರಕ್ರಿಯೆ, ಸಮಾರಂಭದ ಚೌಕಟ್ಟು, ಸಾಧಕರ ಸಾಧನೆಗೆ ಬೆಳಕನ್ನೊಡ್ಡುವ ವ್ಯವಸ್ಥೆಯನ್ನೊಮ್ಮೆ ಸರಕಾರದ ವರಿಷ್ಠರು ನೋಡಬಾರದೇಕೆ?
'ಸುಕೃತ ಪ್ರಶಸ್ತಿ'ಯು ಸುಕೋ ಬ್ಯಾಂಕಿನ ಅಧ್ಯಕ್ಷ ಮನೋಹರ ಮಸ್ಕಿಯವರ ಕನಸಿದು. ಹತ್ತು ವರುಷಗಳ ಕಾಲ ನಿರಂತರವಾಗಿ ಈ ಕೊಡುಗೆ ನೀಡಲು ಬ್ಯಾಂಕ್ ನಿರ್ಧರಿಸಿದೆ. ಕೃಷಿ ಮಾಹಿತಿ ಸಂಗ್ರಹಕ್ಕೆ ಅನುಕೂಲವಾಗುವಂತೆ ರಾಜ್ಯಾದ್ಯಂತ ರೈತ ಕೃಷಿ ಮಾಹಿತಿ ಸಂಪರ್ಕ ಜಾಲ ರೂಪಿಸಲಾಗುತ್ತದೆ ಎನ್ನುವ ಮಸ್ಕಿಯವರ ಆಶಯ ಕನ್ನಾಡಿನ ಎಲ್ಲಾ ಬ್ಯಾಂಕುಗಳಿಗೆ ತಲುಪಬೇಕು.
ಸರಿ, ಎರಡನೇ ವರುಷದ ಪ್ರಶಸ್ತಿ ಆಯ್ಕೆ ಪ್ರಕ್ರಿಯೆ ಆರಂಭವಾಗಿದೆ. ಶಿವಾನಂದ ಕಳವೆಯವರು ಕಡತದೊಂದಿಗೆ ಸಾಧಕರ ಸಾಧನೆಯನ್ನು ದಾಖಲಿಸಲು ಈಗಾಗಲೇ ಹೊರಟುಬಿಟ್ಟಿದ್ದಾರೆ.
ವಜ್ರದ ಹೊಳಪಲ್ಲಿ 'ಕಾಜು ರಾಜ್ಯ'ದ ಕನಸು
ಮಂಗಳೂರಿನಲ್ಲಿ ಜರುಗಿದ ಗೇರು ಸಮಾವೇಶದ (ಕಾಜು ಸಮೆಟ್, ಗೇರು ಮೇಳ) ಪ್ರವೇಶದಲ್ಲಿ ನೀಡಿದ ಗೇರುಹಣ್ಣು ಹೊಟ್ಟೆಗಿಳಿಯುತ್ತಿದ್ದಾಗ ಅರೋಗ್ಯ ಪೋಷಕಾಂಶಗಳು ನೆನಪಾದುವು. ಗೇರು ಬೆಳೆಯುವ ಗ್ರಾಮೀಣ ಪ್ರದೇಶಗಳಲ್ಲಿ ತಯಾರಿಸಿದ ಹುಳಿಬರಿಸಿದ ಗೇರು ರಸದ ಸೇವನೆ ಪಾನಪ್ರಿಯರಿಗಂತೂ ಖುಷಿಯೋ ಖುಷಿ! ಬಹುಶಃ ಈ ಬ್ರಾಂಡ್ ತಾಜಾ ಹಣ್ಣಿನ ರಸದ ಸೇವೆನೆಗಿರುವ ದೊಡ್ಡಿ ಅಡ್ಡಿ.
ಕರ್ನಾಾಟಕ ಗೇರು ಉತ್ಪಾದಕರ ಸಂಘಕ್ಕೆ ವಜ್ರಮಹೋತ್ಸವದ ಸಂಭ್ರಮ. ಎರಡು ದಿವಸದ ಕಾರ್ಯಕ್ರಮದಲ್ಲಿ ಹದಿನಾರು ರಾಜ್ಯಗಳಿಂದ ಗೇರು ಉದ್ಯಮ ಪ್ರತಿನಿಧಿಗಳ ಉಪಸ್ಥಿತಿ. ಜತೆಗೆ ಗೇರು ಬೆಳೆಯುವ ರೈತರ ಉಪಸ್ಥಿತಿ. ಮಾರುಕಟ್ಟೆ, ಬ್ರಾಂಡಿಂಗ್, ಹೊಸ ತಲೆಮಾರಿಗೆ ಉದ್ಯಮವನ್ನು ದಾಟಿಸುವತ್ತ ಯೋಚನೆ-ಯೋಜನೆ, ಗೇರು ಕೃಷಿಯ ವಿಸ್ತರಣೆ, ರೈತರಿಗೆ ಉತ್ತೇಜನ.. ಮೊದಲಾದ ವಿಚಾರಗಳ ಮಾತುಕತೆ. ಗೇರು ನೀತಿ ರೂಪಿಸಲು ಸರಕಾರಕ್ಕೆ ಒತ್ತಾಯ. ಅದ್ದೂರಿ ಸಮಾರಂಭ.
ಐವತ್ತಕ್ಕೂ ಮಿಕ್ಕಿದ ಯಂತ್ರೋಪಕರಣ ಮಳಿಗೆಗಳ 'ಮಿನಿ ಯಂತ್ರ ಮೇಳ'ವು ಸಮಾವೇಶದ ಧನಾಂಶ. ಬೀಜದ ಸಿಪ್ಪೆ ತೆಗೆಯುವ, ಗ್ರೇಡಿಂಗ್, ಕಲರ್ ಸಾರ್ಟಿಂಗ್, ಲೇಬಲಿಂಗ್ ಮಾಡುವ ವಿವಿಧ ಯಂತ್ರಗಳ ಪ್ರಾತ್ಯಕ್ಷಿಕೆಗಳು. ಆಧುನಿಕ ಮಾದರಿಯ ಗ್ರೇಡಿಂಗ್ ಯಂತ್ರವು ಈ ಭಾಗಕ್ಕೆ ಹೊಸತು. ಅಂತಾರಾಷ್ಟ್ರೀಯ ಗುಣಮಟ್ಟಕ್ಕನುಸಾರವಾಗಿ ಉತ್ಪನ್ನವನ್ನು ಸಿದ್ಧಗೊಳಿಸಲು ದುಬಾರಿಯಾದರೂ ಇಂತಹ ಯಂತ್ರಗಳನ್ನು ಭವಿಷ್ಯದಲ್ಲಿ ಹೊಂದುವುದು ಅನಿವಾರ್ಯ, ಎನ್ನುತ್ತಾರೆ ವಾಲ್ಟರ್ ಡಿ'ಸೋಜ.
ಭಾರತದಲ್ಲೇ ಗೇರು ಬೆಳೆಯ ವಿಸ್ತರಣೆಯಾದರೆ ಹೊರ ದೇಶಗಳಿಂದ ಆಮದು ಮಾಡಿಕೊಳ್ಳುವ ಪ್ರಮಾಣವನ್ನು ಕಡಿಮೆ ಮಾಡಬಹುದು. ಗೇರು ಉತ್ಪಾದಕರ ಸಂಘದ ಅಂಕಿ ಅಂಶ ಗಮನಿಸಿ. ರಾಜ್ಯದ ಒಂಭತ್ತು ಜಿಲ್ಲೆಗಳಲ್ಲಿ ನಾಲ್ಕುನೂರು ಗೇರು ಬೀಜ ಸಂಸ್ಕರಣಾ ಕೇಂದ್ರಗಳಿವೆ. ಕಳೆದ ಮೂರು ದಶಕಗಳಲ್ಲಿ ದೇಶದ ವಾರ್ಶಿಕ ಗೋಡಂಬಿ ವ್ಯವಹಾರ ಐವತ್ತು ಕೋಟಿಯಿಂದ ಎರಡು ಸಾವಿರ ಕೋಟಿ ರೂಪಾಯಿಗೆ ಏರಿದೆ. ರಫ್ತು ವಹಿವಾಟು ಮೂಲಕ ರಾಷ್ಟ್ರದ ಬೊಕ್ಕಸಕ್ಕೆ ಲಭಿಸುವ ಆದಾಯದ ಪ್ರಮಾಣವು ಗಣನೀಯವಾಗಿ ಏರಿದೆ.
ಜಗತ್ತಿನ ಗೇರು ಉತ್ಪಾದನೆಯಲ್ಲಿ ನಮ್ಮ ದೇಶ ದೊಡ್ಡಣ್ಣ. ಅಂತಾರಾಷ್ಟ್ರಿಯ ಗುಣಮಟ್ಟವನ್ನು ಹೊಂದಿದ ಉತ್ಪನ್ನ. ಒಂದು ಅಂಕಿಅಂಶದಂತೆ ದೇಶದಲ್ಲಿ 9.82 ಲಕ್ಷ ಹೆಕ್ಟಾರಿನಲ್ಲಿ 7.28 ಲಕ್ಷ ಟನ್ ಗೇರು ಉತ್ಪಾದನೆ. ಸುಮಾರು 1.15 ಲಕ್ಷ ಟನ್ ಗೇರು ಬೀಜವು ಯು.ಎಸ್.ಎ., ನೆದರ್ಲ್ಯಾಂಡ್, ಸೌದಿಅರೇಬಿಯಾ, ಜಪಾನ್, ಫ್ರಾನ್ಸ್, ಜರ್ಮನಿ.. ಮೊದಲಾದ ಅರುವತ್ತೈದು ದೇಶಗಳಿಗೆ ರಫ್ತಾಗುತ್ತದೆ. ಗೇರು ಬೀಜ ವ್ಯವಹಾರದಿಂದ ಐದುಸಾವಿರ ಕೋಟಿ ರೂಪಾಯಿಗೂ ಮಿಕ್ಕಿ ವಿದೇಶಿ ವಿನಿಮಯ ಗಳಿಸುತ್ತಿದೆ. ಗೇರು ಬೀಜದ ಸಿಪ್ಪೆಯ ಎಣ್ಣೆಯಿಂದ ಏನಿಲ್ಲವೆಂದರೂ ಮೂವತ್ತೆಂಟು ಕೋಟಿ ರೂಪಾಯಿ ವ್ಯವಹಾರವಾಗುತ್ತಿವೆ. ದೇಶಾದ್ಯಂತ ಐದುಸಾವಿರ ಗೇರು ಸಂಸ್ಕರಣಾ ಘಟಕಗಳಿವೆ. ಸುಮಾರು ಹದಿನೆಂಟು ಲಕ್ಷ ಟನ್ ಕಚ್ಚಾ ಗೇರುಬೀಜದ ಆವಶ್ಯಕತೆಯಿದೆ.
ದೊಡ್ಡ ಪ್ರಮಾಣದಲ್ಲಿ ರಾಷ್ಟ್ರದ ಬೊಕ್ಕಸಕ್ಕೆ ಆದಾಯ ತರುವ ಗೇರು ಇತರ ಕೃಷಿಗಳಂತೆ ಮುಖ್ಯ ಕೃಷಿಯಾಗಬೇಕು. ವರ್ಷದ ಕೆಲವೇ ತಿಂಗಳು ಹೆಚ್ಚು ಶ್ರಮವಹಿಸಬೇಕಾದ ಕೃಷಿಯ ವಿಸ್ತರಣೆಯಿಂದ ಕೃಷಿಕರಿಗೂ, ಉದ್ಯಮಕ್ಕೂ, ದೇಶಕ್ಕೂ ಲಾಭ. ಉದ್ಯಮ ಪ್ರೋತ್ಸಾಹದ ಜತೆಗೆ ಕೃಷಿ, ಕೃಷಿಕರಿಗೆ ಗೇರು ಬೆಳೆಯುಲು ಗರಿಷ್ಠ ಉತ್ತೇಜನ ನೀಡುವ ಪ್ಯಾಕೇಜ್ ರೂಪುಗೊಳ್ಳಬೇಕು. ಗೇರು ಉತ್ಪಾದಕರ ಸಂಘವು ಮುಂದಿನ ದಿನಗಳಲ್ಲಿ ಸುಮಾರು ಅರುವತ್ತು ಸಾವಿರ ಗೇರು ಸಸಿಗಳನ್ನು ವಿತರಿಸುವ ಯೋಜನೆಗೆ ಸಾಂಕೇತಿಕವಾಗಿ ಚಾಲನೆ ನೀಡಿದೆ. ಇದೊಂದು ಉತ್ತಮ ಪರಿಕ್ರಮ.
ಪುತ್ತೂರಿನ ಗೇರು ನಿರ್ದೇಶನಾಲಯವು ಗೇರು ಕೃಷಿಕರ ಬೆನ್ನಿಗೆ ನಿಂತ ಸರಕಾರಿ ಸಂಸ್ಥೆ. ಇಲ್ಲಿನ ವಿಜ್ಞಾನಿಗಳು ಕೃಷಿಕ ಪರ. ಹಾಗಾಗಿ ಇಲ್ಲಿನ ಬಹುತೇಕ ಕಾರ್ಯಕ್ರಮಗಳಲ್ಲಿ ಕೃಷಿಕರು ಭಾಗವಹಿಸುತ್ತಾರೆ. ಈ ನಿರ್ದೇಶನಾಲಯದ ಸಲಹೆಯಂತೆ ಐನೂರಕ್ಕೂ ಮಿಕ್ಕಿ ಕೃಷಿಕರು ಗೇರು ಕೃಷಿಯನ್ನು ಕೈಗೊಂಡಿದ್ದು ವಿಜ್ಞಾನಿಗಳ ಸರ್ವ ಸಹಕಾರವಿರುವುದು ಗಮನೀಯ. ತನ್ನ ನಿರ್ದೇಶನಾಲಯದ ಆವರಣದಲ್ಲಿ ವಿವಿಧ ವೈವಿಧ್ಯ ಗೇರು ತಾಕುಗಳು ಕೃಷಿಕರಿಗೊಂದು ಪ್ರಾತ್ಯಕ್ಷಿಕೆ. ಗೇರು ಕೃಷಿಯ ವಿಸ್ತರಣೆಯ ಲಾಭವನ್ನು ಕಾಲಕಾಲಕ್ಕೆ ಕೃಷಿಕರಿಗೆ ಒದಗಿಸುತ್ತಾ ಬಂದಿದೆ. ಉಳ್ಳಾಲದ ಗೇರು ಸಂಶೋಧನಾ ಕೇಂದ್ರವು ಕಾಜೂ ವಿಸ್ತರಣೆಯತ್ತ ಶ್ರಮಿಸುತ್ತಿದೆ.
ಮೈಸೂರಿನ ಕೇಂದ್ರ ಆಹಾರ ತಂತ್ರಜ್ಞಾನ ಸಂಸ್ಥೆ, ಬೆಂಗಳೂರು ಕೃಷಿ ವಿಶ್ವವಿದ್ಯಾಲಯ, ಕೇರಳ ಕೃಷಿ ವಿಶ್ವವಿದ್ಯಾಲಯವು ಗೇರು ಹಣ್ಣಿನ 'ಕುಡಿಯಲು ಸಿದ್ಧ' (ರೆಡಿ ಟು ಸರ್ವ್) ಪೇಯ, ಸಿರಪ್.. ತಯಾರಿಗಳ ತರಬೇತಿ ಆಗಾಗ್ಗೆ ನೀಡುತ್ತಿದೆ. ಸಾಕಷ್ಟು ಮಂದಿ ತರಬೇತಿಯನ್ನು ಪಡೆದವರೂ ಇದ್ದಾರೆ. ಉದ್ಯಮವನ್ನು ರೂಪಿಸಿದವರು ಮಾತ್ರ ತೀರಾ ತೀರಾ ಕಡಿಮೆ. ಗೇರು ಹಣ್ಣಿನ ಮೌಲ್ಯವರ್ಧನೆಗೆ ಒಂದಷ್ಟು ತಾಂತ್ರಿಕ, ಮತ್ತಷ್ಟು ಮಾನಸಿಕ ಅಡ್ಡಿಗಳಿವೆ. ಮುಖ್ಯವಾಗಿ ಮದ್ಯದ ಅಂಶ ಇರಬಹುದೆಂಬ ಗುಮಾನಿ. ಮತ್ತೊಂದು ಗಂಟಲು ಕೆರೆಯುವ ಗುಣ. ಇದನ್ನು ಮರೆಮಾಡಲು ಸುಲಭ ವಿಧಾನಗಳಿವೆ ಬಿಡಿ.
ಪುತ್ತೂರು ಸನಿಹದ ಕಾವು ಮಳಿ 'ಮಧು ಮಲ್ಟಿಪ್ಲೆಕ್ಸ್' ಇದರ ಎಂ.ಎನ್.ವೆಂಕಟಕೃಷ್ಣ ಹಣ್ಣಿನ ತಾಜಾ ರಸದಿಂದ ತಯಾರಿಸಿದ ಕುಡಿಯಲು ಸಿದ್ಧ ಪೇಯದ ಉದ್ಯಮಕ್ಕೀಗ ಎರಡನೇ ವರುಷ. 'ಕ್ಯಾಶ್ಯೂ ಫನ್ನಿ' (ಫೆನ್ನಿ ಅಲ್ಲ) ಬ್ರಾಂಡಿನ ಪೇಯಕ್ಕೆ ಮಾವು, ಕಿತ್ತಳೆ, ನಿಂಬೆಯ ಸ್ವಾದದ ಪ್ರತ್ಯೇಕ ಐಟಂ ಜನಪ್ರಿಯವಾಗುತ್ತಿವೆ. ಕಾರ್ಬೋನೇಟೆಡ್ ಡ್ರಿಂಕ್ ಅಲ್ಲದೆ ಗೇರು ಹಣ್ಣಿನ ಸ್ಕ್ವಾಶ್ ತಯಾರಿಸಿದ್ದಾರೆ. ಇವರಉತ್ಪನ್ನ ಕೃಷಿಕರ ಅಂಗೀಕಾರ ಪಡೆದಿದೆ. ಕೃಷಿಕನೊಬ್ಬನ ಈ ಸಾಧನೆಯನ್ನು ಕೇಂದ್ರ ಆಹಾರ ಮಂತ್ರಾಲಯವು ಶ್ಲಾಘಿಸಿದೆ. ದೆಹಲಿಯಲ್ಲಿ ಜರುಗಿದ ವಿಶ್ವ ಮಟ್ಟದ ವಿಚಾರಗೋಷ್ಠಿಗೆ ವೆಂಕಟಕೃಷ್ಣರನ್ನು ಕರೆಸಿ ಆಭಿಪ್ರಾಯ ಪ್ರಸ್ತುತಿಗೆ ಅವಕಾಶ ಮಾಡಿ ಕೊಟ್ಟಿದೆ.
ಮಹಾರಾಷ್ಟ್ರದ ಸಿಂಧುದುರ್ಗ ಜಿಲ್ಲೆಯಲ್ಲಿ 'ಕೊಂಕಣ್ ಕಾಜೂ ಸಮೂಹ್' ಸಂಸ್ಥೆಯ ಯತ್ನದಿಂದ ಕೃಷಿಕ ಕುಟುಂಬಗಳು ಗೇರು ಸಿರಪ್ ತಯಾರಿಸುತ್ತಿವೆ. ಮನೆಮಟ್ಟದಲ್ಲೂ ತಯಾರಿಸುವ, ಬಳಸುವ ಮನಃಸ್ಥಿತಿ ಬಂದಿದೆ. ಗೋವಾ, ಮಹಾರಾಷ್ಟ್ರ ಗಡಿಪ್ರದೇಶಗಳಲ್ಲಿ ನಡೆಯುವ ಉತ್ಸವಗಳ ಸಂದರ್ಭದಲ್ಲಿ ಗೇರು ಪೇಯವನ್ನು ಕೊಡುವ ಪರಿಪಾಠವಿದೆ. ಚಿಕ್ಕಚಿಕ್ಕ ಗೂಡಂಗಡಿಗಳಲ್ಲಿ 'ಕಾಜೂ ಶರಬತ್' ಹೆಜ್ಜೆಯೂರಿದೆ. ಈ ಭಾಗದಲ್ಲಿ ಹಣ್ಣಿನ ಮೌಲ್ಯವರ್ಧನೆ ಯೋಜನೆ ಗರಿಕೆದರುತ್ತಿದೆ. ದಕ್ಷಿಣ ಗುಜರಾತಿನ 'ಭೈಫ್' ಸಂಸ್ಥೆಯು ಗೇರು ಹಣ್ಣಿನ ಮೌಲ್ಯವರ್ಧಿತ ಉತ್ಪನ್ನಗಳ ತಯಾರಿ, ತರಬೇತಿ ನಡೆಸುತ್ತಿದೆ. ದಾಪೋಲಿಯಲ್ಲಿ ಗೇರಿನ ತಾಜಾ ರಸ ಹಿಂಡಿ ಇಪ್ಪತ್ತನಾಲ್ಕು ಗಂಟೆಯೊಳಗೆ ಸರಬರಾಜು ಮಾಡುವ ಜಾಲಸರಪಳಿ ಬಿಗಿಯಾಗುತ್ತಿದೆ. ಇದು ಆಯುರ್ವೇದ ಔಷಧ ತಯಾರಿ ಉದ್ದೇಶಗಳಿಗೆ ಬಳಕೆಯಾಗುತ್ತದೆ.
ಕೇರಳದ ಕಣ್ಣೂರಿನ ಅಬ್ದುಲ್ ನಜ್ಹೀರ್ ಗೇರು ಹಣ್ಣಿನ ರಸವನ್ನು ತಾಜಾ ಆಗಿ ಮಾರುವ ಉದ್ದಿಮೆ ರೂಪಿಸಿದ್ದಾರೆ. ಇವರಿಗೆ ಮಡಕ್ಕತ್ತಾರ ಗೇರು ಸಂಶೋಧನಾ ಕೇಂದ್ರದಿಂದ ತರಬೇತಿ. ಹತ್ತಾರು ಬೂತ್ಗಳನ್ನು ತೆರೆದಿದ್ದಾರೆ. ಬೇಸಿಗೆಯಲ್ಲಿ ಮೂರು ತಿಂಗಳ ಗಳಿಕೆ. ತಲಶ್ಶೇರಿಯ ಕೃಷಿಕರೊಬ್ಬರು ಸಿರಪ್, ಕ್ಯಾಂಡಿ, ಉಪ್ಪಿನಕಾಯಿ ತಯಾರಿಯ ಉದ್ಯಮ ಶುರು ಮಾಡಿದ್ದಾರೆ. ಹೆಚ್ಚೇಕೆ, ಮೊನ್ನೆ ನಡೆಯಿತಲ್ಲಾ, ಕಾಜು ಸಮಾವೇಶದಲ್ಲಿ ಮಂಗಳೂರು ಕಾಪಿಕಾಡಿನ 'ಪ್ರಕೃತಿ ಫುಡ್ಸ್'ನ ಶ್ಯಾಮಲಾ ಶಾಸ್ತ್ರಿಯವರು ಆಕರ್ಷಕ ಸ್ಯಾಚೆಟಿನಲ್ಲಿ ಗೇರು ಹಣ್ಣಿನ ಸ್ಕ್ವಾಶ್ ಮಾರಾಟಕ್ಕಿಟ್ಟಿದ್ದರು. ಜತೆಗೆ ಗೇರಿನ ಉಪ್ಪಿನಕಾಯಿ, ಹಲ್ವ ಕೂಡಾ.
ಕರ್ನಾಾಟಕ ಗೇರು ಉತ್ಪಾದಕರ ಸಂಘಕ್ಕೆ ಮುಂದಿನ ಒಂದು ವರುಷ ವಜ್ರದ ಗುಂಗು. ಗಟ್ಟಿ ಕಾರ್ಯಹೂರಣಗಳ ಸಂಪನ್ನತೆ. ಗೇರು ಬೀಜದ ಉದ್ದಿಮೆಯೊಂದಿಗೆ ಹಣ್ಣಿನ ಮೌಲ್ಯವರ್ಧನೆಯತ್ತಲೂ ಯೋಚನೆ. 'ಕರ್ನಾಾಟಕವು ಕಾಜು ರಾಜ್ಯವಾಗಬೇಕು' ಎನ್ನುವುದು ಸಂಘದ ಆಶಯ.
ಆಹಾರ ಸುರಕ್ಷೆಯತ್ತ 'ಎಲೆಯರಿವು' ಸಾಕ್ಷರತೆ
ತಲಶ್ಶೇರಿ ಸನಿಹದ ಕದಿರೂರು ಹಳ್ಳಿಯಲ್ಲಿ ಮೂಡಿದ 'ಎಲೆಯರಿವು' ಚಳುವಳಿಗೆ ಐದು ವರುಷ. ಸಾವಿರಾರು ಅಡುಗೆ ಮನೆಗಳನ್ನು ನಿರ್ವಿಷಗೊಳಿಸಿದ ಹಿರಿಮೆ. ಪೌಷ್ಠಿಕ ಆಹಾರ ಸೇವನೆಯತ್ತ ಒಲವು ಮೂಡಿಸಿದ ಗರಿಮೆ. ಆರೋಗ್ಯ ಭಾಗ್ಯವಾಗಲು ಇದೊಂದೇ ಹಾದಿ ಎಂಬ ನಿಶ್ಚಲ ಮನಃಸ್ಥಿತಿಯ ನಿರ್ಮಾಣ. ಪಿ.ಡಬ್ಲ್ಯೂ.ಡಿ. ಇಲಾಖೆಯ ಇಂಜಿನಿಯರ್ ಸಜೀವನ್ ಕಾವುಂಗರ ಬಿತ್ತಿದ ಅರಿವಿನ ಬೀಜವೀಗ ಮರವಾಗಿದೆ.
ಎಲೆಯರಿವು ಎಂದಾಗ ಎಲೆಯನ್ನು ಮಾತ್ರ ತರಕಾರಿಯಾಗಿ ತಿನ್ನಿ ಎಂದರ್ಥವಲ್ಲ. ಬದುಕಿನಲ್ಲಿ ಮಾತ್ರೆ, ಕಷಾಯಗಳಿಗೆ ವಿದಾಯ ಹೇಳಲು ಹಿಂದಿನ ಆಹಾರ ಕ್ರಮದತ್ತ ಹೊರಳುವುದು ಉದ್ದೇಶ. ಮಾರುಕಟ್ಟೆಯ ಬಹುತೇಕ ತರಕಾರಿಗಳು ವಿಷಯುಕ್ತ. ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ. ಹಾಗಾಗಿ ತರಕಾರಿಗಾಗಿ ಮಾರುಕಟ್ಟೆಯ ಅವಲಂಬನೆಗೆ ವಿದಾಯ ಹೇಳಿ ಮಾವು, ಹಲಸು, ಪಪ್ಪಾಯ ಮತ್ತು ವಿವಿಧ ಎಲೆಗಳನ್ನು ಬಳಸಬೇಕೆನ್ನುವುದು ಚಳುವಳಿಯ ಉದ್ದೇಶ.
ದೇಶದಾದ್ಯಂತ ಪೌಷ್ಠಿಕ ಆಹಾರದ ಕೊರತೆಯತ್ತ ಸರಕಾರವೇ ಬೊಟ್ಟು ಮಾಡಿದೆ. ಅದಕ್ಕಾಗಿ ಸಾವಿರಗಟ್ಟಲೆ ವ್ಯಯಿಸಬೇಕಾದ್ದಿಲ್ಲ. ಮುಖ್ಯವಾಗಿ ವಿಷದ ಸಂಪರ್ಕದಿಂದ ಹೊರಬರಬೇಕು. ಸ್ಥಳೀಯ ಸಂಪನ್ಮೂಲಗಳನ್ನು ಬಳಕೆ ಮಾಡುವಂತಾಗಬೇಕು. ಸಜೀವನ್ ಕಾವುಂಗರರ ಆರೋಗ್ಯ, ಪೌಷ್ಠಿಕತೆಯ ದೂರದೃಷ್ಟಿಗೆ ಕೇರಳಾದ್ಯಂತ ಸ್ಪಂದಿಸಿದವರು ನೂರಾರು ಮಂದಿ. ಆಂದೋಳನದಲ್ಲಿ ಹೆಜ್ಜೆಯಿರಿಸಿದವರು ಸಾವಿರಾರು. ಎಲೆಗಳನ್ನು ಸಜೀವನ್ ಗುರುತಿಸಿ, ಸಸ್ಯಶಾಸ್ತ್ರೀಯ ಹೆಸರುಗಳೊಂದಿಗೆ ಮುದ್ರಿಸಿ ಪ್ರದರ್ಶನ ಏರ್ಪಡಿಸುತ್ತಾರೆ.
ಈಗಾಗಲೇ ಮೂನ್ನೂರೈವತ್ತಕ್ಕೂ ಮಿಕ್ಕಿ ತರಬೇತಿ ಶಿಬಿರಗಳಾಗಿವೆ. ಕಣ್ಣೂರು ಜಿಲ್ಲೆಯಲ್ಲೆ ಆಧಿಕ ಎನ್ನಬಹುದೇನೋ. ವಿದ್ಯಾರ್ಥಿಗಳಿಗೆ ಅರಿವು ಮೂಡಿಸುವ ಸೆಮಿನಾರ್ಗಳನ್ನು ಏರ್ಪಡಿಸಿದ್ದಾರೆ. ಮಾಹಿತಿಯ ಕರಪತ್ರಗಳನ್ನು ಅಚ್ಚು ಹಾಕಿಸಿದ್ದಾರೆ. ಸಸ್ಯಗಳ ಡೆಮೋ ಏರ್ಪಡಿಸಿದ್ದಾರೆ. ಬೆಳೆಸುವ ರೀತಿಯನ್ನು ತಿಳಿ ಹೇಳುತ್ತಾರೆ. ಆಹಾರದ ಜತೆಗೆ ಔಷಧೀಯ ಗುಣವನ್ನು ಪ್ರಸ್ತುತಿ ಮಾಡುವುದರಿಂದ ಅಮ್ಮಂದಿನ ಒಲವು ಗಟ್ಟಿಯಾಗುತ್ತಿದೆ. ವಿಷಮುಕ್ತ ಆಹಾರದ ಸಾಕ್ಷರತೆ ಜೀವಂತವಾಗಿರುವ ಕೇರಳದಲ್ಲಿ ಸಾವಯವ ಚಳುವಳಿಯ ಬೀಸುಹೆಜ್ಜೆಯಿದೆ. ಸಜೀವನ್ ಯೋಚನೆಗಳಿಗೆ ಇದು ಮತ್ತಷ್ಟು ಪುಷ್ಟಿ ನೀಡಿದೆ.
'ಭಕ್ಷ್ಯ ಸ್ವರಾಜ್' ಆಹಾರ ಸ್ವಾವಲಂಬನೆಗೆ ಒತ್ತು ನೀಡುವ ಸರಕಾರೇತರ ಸಂಸ್ಥೆ. ಕಾಸರಗೋಡು ಮೂಲದ ಸನ್ನಿ ಪೈಕಡ ಇದರ ಸಮನ್ವಯಕಾರರು. ಕೇರಳ ರಾಜ್ಯವು ತರಕಾರಿಯಲ್ಲಿ ಪರಾವಲಂಬಿ. ಇತ್ತ ಕರ್ನಾಾಟಕ, ಅತ್ತ ತಮಿಳುನಾಡಿನತ್ತ ಕೈಚಾಚಬೇಕಾದ ಸ್ಥಿತಿ. ಒಂದು ದಿವಸ ತರಕಾರಿ ತುಂಬಿದ ಲಾರಿ ಬಾರದಿದ್ದರೆ ಅಡುಗೆ ಮನೆಗಳಿಗೆ ಬೀಗ! ಗ್ರಹಿಸದೆ ಬರುವ ಮುಷ್ಕರ, ಹರತಾಳಗಳಿದ್ದರೆ ತರಕಾರಿಯ ಲಭ್ಯತೆ ಅಷ್ಟಕ್ಕಷ್ಟೆ. ಸಿಕ್ಕರೂ ದುಬಾರಿ. ಒತ್ತಡದ ಬದುಕು. ತರಕಾರಿ ಬಾರದಿದ್ದರೂ ಹಿತ್ತಿಲಿನ ಸಂಪನ್ಮೂಲಗಳಿಂದ ಅಡುಗೆ ಮಾಡಬಲ್ಲೆ ಎನ್ನುವ ವಿಶ್ವಾಸ ಅಮ್ಮಂದಿರಲ್ಲಿ ಬರಬೇಕು. ತರಕಾರಿಯಲ್ಲಿ ಸ್ವಾವಲಂಬನೆ ಸಾಧಿಸಬೇಕಾದರೆ ಎಲೆಯರಿವಿನಂತಹ ಚಳುವಳಿ ಅನಿವಾರ್ಯ, ಎನ್ನುತ್ತಾರೆ.
ಆಹಾರಗಳ ಅಸಮರ್ಪಕ ಸೇವನೆಯಿಂದಾಗಿ ಹೆಣ್ಮಕ್ಕಳು ಆರೋಗ್ಯ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ. ಎಲೆ ತರಕಾರಿಗಳ ಸೇವನೆಯಿಂದ ಸಮಸ್ಯೆಗಳನ್ನು ಪರಿಹರಿಸಿಕೊಳ್ಳಲು ಸಾಧ್ಯವೆಂದು ಕಂಡುಕೊಂಡ 'ಆಯುಷ್ಮತಿ ಮಿಶನ್', ಸಜೀವನ್ ಕೆಲಸಗಳಿಗೆ ಪ್ರೇರಣೆ ನೀಡುತ್ತಿದೆ. ಕೇರಳ ವಿಶ್ವವಿದ್ಯಾನಿಲಯದ ಸಾರಥ್ಯದ ಮಿಶನ್ನಿನ ಕಾರ್ಯಕ್ರಮದ ಮುಖ್ಯಸ್ಥೆ ಡಾ.ಗೀತಾ ಕುಟ್ಟಿ. ಸಜೀವನ್ ತೋಟದಲ್ಲೇ ವಿವಿಧ ಎಲೆಗಳ ಪ್ರಾತ್ಯಕ್ಷಿಕೆಗಳಿಗೆ ಮಿಶನ್ ನೆರವು ನೀಡಿದೆ. ಬಳಸುವ, ನೋಡುವ ಮತ್ತು ಆಸಕ್ತರಿಗೆ ಗಿಡ, ಬೀಜಗಳನ್ನು ಒದಗಿಸುವ ವ್ಯವಸ್ಥೆ.
ಆರೋಗ್ಯ ಕಾಳಜಿಯ ಹತ್ತಾರು ಚಳುವಳಿಗಳು ವಿವಿಧ ಸ್ವರೂಪದಲ್ಲಿ ಕೇರಳದಲ್ಲಿ ಜೀವಂತವಾಗಿದೆ. ಸಜೀವನ್ ಯೋಚನೆಗಳಿಗೆ ಇಂತಹ ಚಳುವಳಿಗಳು ಪೂರಕವಾಗಿವೆ. ಸಜೀವನ್ ಹೇಳುತ್ತಾರೆ, ಹೊರ ರಾಜ್ಯಗಳಿಂದ ಬರುವ ತರಕಾರಿಗಳು ವಿಷದಲ್ಲಿ ಮಿಂದು ಬರುವುದೇ ಅಧಿಕ. ವಿಷದ ಗಾಢತೆಯ ಬೊಬ್ಬೆಯಿಂದ ತರಕಾರಿಗಳು ನಿರ್ವಿಷವಾದಾವೇ? ಇದರಿಂದ ಹೊರ ಬರಲು ಗೊಣಗಾಟ ಪರಿಹಾರವಲ್ಲ. ಮನೆಮಟ್ಟದಲ್ಲಿ ನಾವೇನು ಮಾಡಬಹುದು ಎಂಬ ಚಿಂತನೆಗಳು ಎಲೆಯರಿವು ಚಳುವಳಿಯಿಂದ ಮೂಡಿದೆ. ನಮ್ಮೂರಿಗೆ ಬರುವ ಬೇವಿನ ಸೊಪ್ಪು ಹೆಚ್ಚು ಕೀಟನಾಶಕದಲ್ಲಿ ಮಿಂದಿರುತ್ತವೆ. ಬೇವಿನಸೊಪ್ಪನ್ನು ನೇರವಾಗಿ ಅಡುಗೆಗೆ ಬಳಸುವ ಮೊದಲು ಅದನ್ನು ಬದಿಗಿಟ್ಟು ಯೋಚಿಸುವ ಮನಃಸ್ಥಿತಿ ಅಮ್ಮಂದಿರಲ್ಲಿ ನಿರ್ಮಾಣವಾದುದು ಎಲೆಯರಿವು ಚಳುವಳಿಯಿಂದ.
ಆಯಷ್ಮತಿ ಮಿಶನ್ನಿನ ಡಾ.ಗೀತಾ ಕುಟ್ಟಿಯವರು ಕೇರಳಾದ್ಯಂತ ಓಡಾಡಿದವರು. ಕೇರಳದಲ್ಲಿ ಏನಿಲ್ಲವೆಂದರೂ ಕನಿಷ್ಠ ಹತ್ತರಿಂದ ಇಪ್ಪತ್ತು ಸೆಂಟ್ಸ್ ಜಾಗ ಹೊಂದಿರುವವರು ಅಧಿಕ. ಮನೆಗಳ ಸುತ್ತಮುತ್ತಲಿನ ಜಾಗದಲ್ಲಿ ಮಾವು, ಹಲಸು, ಹಣ್ಣುಗಳ ಒಂದೊಂದು ಗಿಡ, ಮರವಾದರೂ ಇದ್ದೇ ಇರುತ್ತದೆ. ಅದನ್ನು ಉಳಿಸಿಕೊಳ್ಳುತ್ತಿದ್ದಾರೆ. ಆಹಾರ ಸ್ವಾವಲಂಬನೆಗಾಗಿ ವರ್ಷಪೂರ್ತಿ ಅಲ್ಲದಿದ್ದರೂ ಬಹುತೇಕ ತಿಂಗಳುಗಳು ಲಭ್ಯವಾಗುವಂತೆ ತರಕಾರಿಯನ್ನು ಬೆಳೆಯುವ ಅರಿವನ್ನು ಮೂಡಿಸಬೇಕು.
ಸಜೀವನ್ ಅವರ ಜತೆಯಲ್ಲಿ ಹೆಜ್ಜೆ ಹಾಕುತ್ತಿರುವ ವಿ.ಒ.ಪ್ರಭಾಕರನ್ ಹೇಳಿದ ಒಂದು ಉದಾಹರಣೆ ನೋಡಿ. ಕಾಡು ಕೆಸು ಸಹಜವಾಗಿ ಬೆಳೆಯುವಂತಾದ್ದು. ಅದರ ಗೆಡ್ಡೆಯನ್ನು ಬಳಸುವುದು ಎಲ್ಲರಿಗೂ ಗೊತ್ತಿದೆ. ಅದರ ದಂಡು, ಎಲೆ ಬಳಸಿ ಗೊತ್ತಿಲ್ಲ. ಎಲೆಯರಿವು ಚಳುವಳಿಯಿಂದಾಗಿ ಎಲೆ, ದಂಡನ್ನು ಬೆಳೆಸುವ ಅಭ್ಯಾಸ ರೂಢಿತವಾಗಿದೆ. ಆಹಾರ ಸುರಕ್ಷೆಯು ಇಂತಹ ಸಣ್ಣ ಸಣ್ಣ ಹೆಜ್ಜೆಗಳಿಂದ ಸಾಧ್ಯವಾಗಿದೆ. ಒಂದೆರಡು ಬುಡ ಹಿತ್ತಿಲಿನಲ್ಲಿ ಇದ್ದು ಬಿಟ್ಟರೆ ಯಾವುದೇ ಆರೈಕೆಯಿಲ್ಲದೆ ಬೆಳೆದುಬಿಡುತ್ತದೆ.
ತರಕಾರಿಯನ್ನು ಗೊಬ್ಬರ, ನೀರು ಹಾಕಿ ಆರೈಕೆ ಮಾಡಿ ಬೆಳೆಸುವುದು ಒಂದು ವಿಧ. ಯಾವುದೇ ಆರೈಕೆ ಬೇಡದೆ, ಸ್ವಲ್ಪ ನಿಗಾ ಇದ್ದರೆ ಬೆಳೆಯುವ ಎಲೆ ತರಕಾರಿಗಳನ್ನು ಹೆಚ್ಚು ಬೆಳೆಯಲು ಸಜೀವನ್ ಒತ್ತು ಕೊಡುತ್ತಾರೆ. ಎಳವೆಯಿಂದಲೆ ಮಕ್ಕಳಲ್ಲಿ ಆಹಾರದ ಅರಿವನ್ನು ಬಿತ್ತುವ ಸಜೀವನ್ ಯೋಜನೆಗಳು ಯಶವಾಗುತ್ತಿವೆ. ಜತೆಗೆ ಶಿಕ್ಷಣ ಇಲಾಖೆಯು ಶಾಲೆಗಳಲ್ಲಿ ಕೈತೋಟ ಮಾಡುವಂತೆ ಪ್ರೇರೇಪಿಸುತ್ತಿದೆ. ವಿದ್ಯಾಥರ್ಿಗಳಿಗೆ ಪಠ್ಯದ ಜತೆಗೆ ಕೃಷಿ ಪಾಠಕ್ಕೂ ಒತ್ತು ಕೊಡುತ್ತಿದೆ.
ಈಚೆಗಿನ ಒಂದು ಅಂಕಿ ಅಂಶ ನೋಡಿ. ಕಾಸರಗೋಡು ಜಿಲ್ಲೆಯ ಸುಮಾರು ನೂರು ಶಾಲೆಗಳಲ್ಲಿ 2014-15ರ ಶೈಕ್ಷಣಿಕ ವರ್ಷದಲ್ಲಿ 1,416 ಮೆಟ್ರಿಕ್ ಟನ್ ತರಕಾರಿ ಬೆಳೆದಿದ್ದಾರೆ. ಕೃಷಿ ಇಲಾಖೆಯು ಶಾಲೆ ಮತ್ತು ಮನೆಗಳಲ್ಲಿ ತರಕಾರಿ ಬೆಳೆಸಲೋಸುಗ ಎರಡು ಲಕ್ಷ ತರಕಾರಿ ಬೀಜದ ಪ್ಯಾಕೆಟ್ಗಳನ್ನು ವಿತರಿಸಿತ್ತು. ಎಂಟುನೂರು ಹೆಕ್ಟೇರ್ ಪ್ರದೇಶದಲ್ಲಿ ಕೃಷಿ ಮಾಡಲಾಗಿತ್ತು. ಕೃಷಿ ಭವನಗಳೂ ಸ್ಪಂದನ ನೀಡಿದೆ. .. ಅಂಕಿಅಂಶಗಳ ಸತ್ಯಾಸತ್ಯತೆ, ವಾಸ್ತವಗಳು ಕೆಲವೊಮ್ಮೆ ಓದುವುದಕ್ಕೆ ರೋಚಕ! ಕೇರಳದ ಶಾಲೆಗಳಲ್ಲಿ ಅನುಷ್ಠಾನಕ್ಕೆ ಬಂದಿದೆ. ಎಲ್ಲವನ್ನೂ ವಿದ್ಯಾರ್ಥಿಗಳೇ ಮಾಡಿದ್ದಾರೆ ಎನ್ನುವುದಕ್ಕಿಂತಲೂ ಅಧ್ಯಾಪಕರ ಪ್ರೇರಣೆ, ಇಲಾಖೆಯ ಒತ್ತಡದಿಂದ ಹಸಿರಿನ ಶಿಕ್ಷಣವು ಶಾಲೆಗಳಲ್ಲಿ ದೊರಕಿರುವುದು ಮಕ್ಕಳ ಭಾಗ್ಯ.
ಪೆರ್ಲ ಸನಿಹದ ಉಕ್ಕಿನಡ್ಕದ ಡಾ.ಜಯಗೋವಿಂದ ಅವರ ಮಾತಿನೊಂದಿಗೆ ಎಲೆಯರಿವಿನ ಗಾಥೆಯನ್ನು ಮುಗಿಸುತ್ತೇನೆ - ವಿಶ್ವಾದ್ಯಂತ ಆಹಾರದಲ್ಲಿ ಸಾವಿರಕ್ಕೂ ಮಿಕ್ಕಿ ಸೊಪ್ಪುಗಳು ಬಳಕೆಯಾಗುತ್ತಿವೆ. ಹೆಚ್ಚಿನ ಸೊಪ್ಪುಗಳಿಂದ ವಿಟಮಿನ್ 'ಎ', ಕಬ್ಬಿಣದಂಶ, ಪೊಟೇಶಿಯಂಗಳು ದೇಹಕ್ಕೆ ಲಭ್ಯ. ನೂರು ಗ್ರಾಮ್ ಪಾಲಕ್ ಸೊಪ್ಪು ಒಂದು ದಿನಕ್ಕೆ ಬೇಕಾದ ವಿಟಮಿನ್ಗಳನ್ನು ನೀಡಬಲ್ಲುದು. ವಾರದಲ್ಲಿ ಮೂರು ಸಲವಾದರೂ ಒಟ್ಟು ಕನಿಷ್ಠ ಮುನ್ನೂರು ಗ್ರಾಮ್ ಸೊಪ್ಪು ಸೇವಿಸಬೇಕು. ಇದು ಶರೀರ ಶುದ್ಧೀಕರಣದ ಕ್ರಿಯೆಗೆ ಸಹಕಾರಿ, ದ.ಕ.ಜಿಲ್ಲೆಯ ಬಂಟ್ವಾಳ ತಾಲೂಕಿನ ಕೇಪು-ಉಬರು ಹಲಸು ಸ್ನೇಹಿ ಕೂಟವು ಆಯೋಜಿಸಿದ ಸೊಪ್ಪು ತರಕಾರಿಗಳ ತರಬೇತಿಯಲ್ಲಿ ನೀಡಿದ ಮಾಹಿತಿಯಿದು.
ತರಕಾರಿಗಳನ್ನು ಬೆಳೆಸಿ, ಕೊಯ್ಯುವುದು ಮಾತ್ರ ಸ್ವಾವಲಂಬನೆಯಲ್ಲ. ತನ್ನಷ್ಟಕ್ಕೆ ಬೆಳಯುವ ಸಸ್ಯಗಳು ಕೂಡಾ ಸೇವನೆಗೆ ಯೋಗ್ಯ. ಈ ಮಾಹಿತಿಯನ್ನು ಬಿತ್ತರಿಸುವ ಸಜೀವನ್ ಕಾವುಂಗರ್ ಕನಸಿನ ಚಳುವಳಿಯು ಹಲವಾರು ಅಡುಗೆ ಮನೆಗಳನ್ನು ನಿರ್ವಿಷಗೊಳಿಸಿವೆ. ಪೌಷ್ಠಿಕತೆ, ಆರೋಗ್ಯ ಕಾಳಜಿ ಮತ್ತು ಆಹಾರ ಭದ್ರತೆಯು ಜನರಲ್ಲಿ ಮೂಡುತ್ತಿದೆ. ಆರೋಗ್ಯ ಭಾಗ್ಯವಾಗಬೇಕೆನ್ನುವ ಚಳುವಳಿಗೆ ಹತ್ತಾರು ಸಂಸ್ಥೆಗಳು ಸಾಥ್ ನೀಡಿರುವುದು ಉತ್ತಮ ಬೆಳವಣಿಗೆ.
ಕನ್ನಾಡಿನಲ್ಲಿ ಹಲವು ಭಾಗ್ಯಗಳು ಹುಟ್ಟಿವೆ, ಹುಟ್ಟುತ್ತಿವೆ. ಆ ಗೊಂಚಲಿಗೆ 'ನಿರ್ವಿಷ ಆಹಾರ ಭಾಗ್ಯ' ಯಾವಾಗ ಸೇರುವುದೋ?
Saturday, April 11, 2015
'ಪುರುಷೋತ್ತಮ ಸಮ್ಮಾನ' ಪ್ರದಾನ.
ಪುರುಷೋತ್ತಮ ರಾವ್ ಕೃಷಿ ಸಂಶೋಧನಾ ಪ್ರತಿಷ್ಠಾನ (ರಿ) ಆಯೋಜಿಸಿದ
ಕಾರ್ಯಕ್ರಮದಲ್ಲಿ
ಚಿಕ್ಕಮಗಳೂರು ಜಿಲ್ಲೆಯ ತರೀಕೆರೆ ತಾಲೂಕಿನ ಅಮೃತಾಪುರ ಹೋಬಳಿಯ
ವಿಠಲಾಪುರ ಗ್ರಾಮದ
ಶ್ರೀಮತಿ ರುದ್ರಮ್ಮಾ ಮತ್ತು ಶ್ರೀ ರುದ್ರಪ್ಪ ಹಾಗೂ
ಶ್ರೀಮತಿ ಚಂದ್ರಮ್ಮಾ ಮತ್ತು ಶ್ರೀ ವೀರಪ್ಪ (ವೀರಣ್ಣ)
ಇವರ ಕುಟುಂಬಕ್ಕೆ
'ಪುರುಷೋತ್ತಮ ಸಮ್ಮಾನ' ಪ್ರದಾನ.
(ಚಿತ್ರ ; ವಿಜಯಕೃಷ್ಣ ದರ್ಭೆ, ಪುತ್ತೂರು)
