Wednesday, July 29, 2009

'ಮಾರಿ' ಮೆಣಸು

ನಮ್ಮ ಭಾರತದ್ದೇ ಆದ 'ಭೂತ್ ಜೊಲೋಕಿಯಾ' ಎಂಬ ಖಾರದ 'ಗಾಂಧಾರಿ ಮೆಣಸು' ಗಿನ್ನೆಸ್ ವಿಶ್ವ ದಾಖಲೆ ಪುಸ್ತಕದ ಪ್ರಕಾರ ಜಗತ್ತಿನ ಅತಿ ಖಾರದ ಮೆಣಸು. ತೀರ್ಥಹಳ್ಳಿ ಸಮೀಪದ ಸುಳುಗೋಡು-ಮಜ್ಜಿಗೆಸರದಲ್ಲಿ ಇಂತಹುದೇ ಖಾರದ ಮೆಣಸಿದೆ. ಅದರ ಖಾರವೇ ಮಾನವಾಗಿ ಅದು 'ಮಾರಿ ಮೆಣಸು'.

ಒಮ್ಮೆ ಪರೀಕ್ಷೆಗೆಂದು ಸುಬ್ರಹ್ಮಣ್ಯರು ಈ ಮೆಣಸನ್ನು ಸಾಂಬಾರಿಗೆ ಬಳಸಿದ್ದರು. ಎಷ್ಟು ಖಾರವೆಂದರೆ ಅಂದು ಯಾರೂ ಒಂದು ತುತ್ತನ್ನೂ ತಿಂದಿಲ್ಲವಂತೆ! ಗಿಡದಲ್ಲಿ ಮೆಣಸು ಮಾಗಿದಾಗ ಹಕ್ಕಿಗಳು ಸಹಜವಾಗಿ ಆಕರ್ಷಿತವಾಗುತ್ತವೆ. ಆದರೆ ಮಾರಿಯ ಹತ್ತಿರ ಊಹೂಂ!

'ಮೆಣಸನ್ನು ಜಜ್ಜಿ ನೀರಿನಲ್ಲಿ ಬೆರೆಸಿ, ಅಲಸಂಡೆ ಗಿಡಕ್ಕೆ ಸಿಂಪಡಿಸಿದೆವು. ಅದಕ್ಕೆ ಬರುವ ಹೇನುಗಳೆಲ್ಲಾ ಸತ್ತುಹೋದುವು' ಸುಬ್ರಹ್ಮಣ್ಯ ಮೆಣಸಿನ ಖಾರವನ್ನು ನಿರೂಪಿಸಿದ್ದು ಹೀಗೆ. ಬೀಜ ಬನವಾಸಿ ಸಮೀಪದ ಅಜ್ಜನ ಮನೆಯಿಂದ ತಂದಿದ್ದರು.

ಎಳೆ ಕಾಯಿಯಲ್ಲಿ ಖಾರವಿಲ್ಲ. ಉತ್ತಮ ಪರಿಮಳ. ಬೋಂಡಾ, ಸಾಸಿವೆ ತಯಾರಿಸುತ್ತಾರೆ. ಕಾಯಿ ಬಲಿಯುತ್ತಾ ಹೋದಂತೆ ಗಡಸಾಗಿ, ಹೊಳಪು ಬರುತ್ತದೆ. ಹಣ್ಣಾದಾಗ ಕಡು ಹಳದಿ ಬಣ್ಣ. ಜೀರಿಗೆ ಮೆಣಸಿನ ಗಿಡಕ್ಕಿಂತ ತುಸು ಎತ್ತರವಷ್ಟೇ. ಗಿಡದ ಆಯಷ್ಯ ಐದಾರು ವರುಷ. ಗಿಡದ ಬುಡದಲ್ಲಿ ಕಳೆ ಇರಬಾರದು. ನೀರು ನಿಲ್ಲಬಾರದು. ಮಳೆಗಾಲ ಕಡಿಮೆಯಾಗುತ್ತಾ, ಛಳಿಗಾಲ ಶುರುವಾಗುವ ಈ ಮಧ್ಯಂತರದಲ್ಲಿ ಇಳುವರಿ ಜಾಸ್ತಿ.

'ನಾವು ಅದನ್ನು ಹಣ್ಣಾಗಲು ಬಿಡುವುದೇ ಇಲ್ಲ. ಎಳೆಯದರಲ್ಲೇ ಕೊಯ್ಯುತ್ತೇವೆ' ಮನೆಯಜಮಾನ ನಾಗಭೂಷಣಯ್ಯ ದನಿಗೂಡಿಸುತ್ತಾರೆ. ಹಣ್ಣಾದ ಬಳಿಕ ಮೆಣಸನ್ನು ಸೀಳುವುದಿದ್ದರೆ ಕೈಗೆ ಪ್ಲಾಸ್ಟಿಕ್ನ್ನು ಗ್ಲೌಸಿನಂತೆ ಬಳಸಿ ಎನ್ನಲು ಮರೆಯಲಿಲ್ಲ. 'ಈ ಮೆಣಸು ನಮ್ಮಲ್ಲೂ ಇತ್ತು. ಆದರೆ ಅದರ ಖಾರ ಅಷ್ಟು ಉಂಟೆಂದು ಗೊತ್ತಿಲ್ಲ' ಎನ್ನುತ್ತಾರೆ ಪುತ್ತೂರಿನ ಮರಿಕೆಯ ಎ.ಪಿ. ಸದಾಶಿವ. ಈ ಮೆಣಸೂ ಗಿನ್ನೆಸ್ ಸೇರಲು ಅರ್ಹತೆ ಇದೆಯೇನೋ? ಪರೀಕ್ಷಿಸಬಹುದು.
* ಸುಬ್ರಹ್ಮಣ್ಯ ಎಂ.ಎನ್. ಮಜ್ಜಿಗೆಸರ, ಅಂಚೆ ಮೇಳಿಗೆ, ತೀರ್ಥಹಳ್ಳಿ ತಾಲೂಕು - 577 415,
08181-290 080

2 comments:

Harish Halemane said...

Nammalloo ide ee menasu.... Upayoga gottiralilla... Dhanyavadagalu..........!

RAMESH DELAMPADY said...

I had seen this in my uncles house. Looks like flowers at first sight.Wonder full.

Post a Comment